И по 16 години од неговата смрт, неговите „нови“ раскази излегоа „на виделина“ преточени во книгата „Патникот од долината“

Тој милозвучен радиофоничен глас кој некогаш секојдневно се слушаше на брановите на Радио Струмица, препознатливиот глас на легендата на струмичкото и македонското спикерство, Гонца Шивачева, синоќа со расказот за „патникот од долината“, со промена на интонацијата, акцентот, паузата во интерпретацијата, пак ни ги пренесе приказните на починатиот роднокраен писател и новинар Бранко Бјадов.
И по 16 години од неговата смрт уште излегуваат негови дела, напишани во времето на својот не толку долг 67-годишен живот, втора книга по неговата смрт. Поделена во два автономни дела „Жолтото училиште“ со 25 раскази од времето на детството на авторот Бранко Бјадов и вториот дел насловен „Патникот од долината“, во кој новинарското искуство му понудил цел репертоар на теми и ги напишал како репортажи.
„Во книгата на Бранко Бјадов може така условно да се каже дека постојат три групи на раскази. Првата група на раскази се оние кои имаат некоја заокружена приказна, се базираат врз анегдотата, некои од нив, и имаат едно заокружено сиже. Втората група се оние раскази кои можат да се наречат лирско-медитативни раскази во коишто тој емотивно го оживува тоа детство преку еден мис на асоцијации на преспотекции, тоа се во стилска смисла малку поинакви раскази коишто се проникнати со едно лирско чуствување. А осум од тие текстови по својот стил се доближуваат до стилот на репортажата, на некој начин користат елементи на репортажата како новинарски жанр, но сепак припаѓаат на уметничкиот расказ“ – кажа еден од промоторите на синоќешниот омаж на ликот, делото и значењето на Бранко Бјадов, пистателот и драматург, Ацо Гогов.
За Гонца Запрова Анастасова, координатор и уредник на овој проект, 25-те раскази во првиот дел од публикацијата се прекрасни, лесно читливи и во себе ја носат целокупната авторска мудрост на писателот и новинар Бранко Бјадов, додека во вториот дел авторот на еден толку суптилен начин, со умешност и леснотија преку дваесет репортажи со субјективна лирика не води на едно патување наречено живот.
„Духот на метафората за животот, долината, долинарите и нивната судбина, Бјадов живо ја преточува до читателот на начин својствен само нему. Всушност, она што ја прави ова публикација важна за нас е токму зачувувањето на лектичкиот слој од дијалектизми, турцизми, архаизми, којшто упатува на една подзаборавена убавина на говорот во Струмица и кој во книгата има своја уметничка силисходност. Тој спој од дијалектизми, турцизми и архаизми го образуваат дијасистемот на Бјадов кој е доста интересен“ – кажа Гонца Запрова Анастасова.
На промоцијата пред многубројната публика, љубители на пишаниот збор беше презентирано и документарно видео посветено на Бранко Бјадов во кое говорат и негови поранешни колеги од некогашната Радио Струмица, каде тој поголемиот дел од својот работен век го помина како новинар, а подолг период беше и директор, главен и одговорен уредник на ова информативна куќа во Струмица.
Бранко Бјадов бил член на Друштвото на писателите на Македонија. Бил учесник на „Струшките вечери на поезијата“. Неколку песни му се преведени на англиски, француски, руски и ерменски јазик. Автор е на четири книжевни објави, од кои две се поетски. Автор е и на неколку драми и мноштво песни и раскази кој не успеал да ги редактира.
ФОТОГАЛЕРИЈА