И официјално од денеска започна со работа Стационарот за заловување на бездомни кучиња во Струмица

По една година од формирањето на новото Јавно претпријатие за заловување на бездомни кучиња Стационар „Лана“ во Струмица од денеска и официјално започна со работа ова општинско претпријатие кое ќе се грижи за хуман третман и благосостојба на кучињата скитници низ улиците на Струмица со што треба трајно и ефикасно да биде намален нивниот број.

Стационарот располага со 58 боксови, амбуланта и хируршка сала каде кучиња скитници ќе бидат згрижени, стерилизирани, вакцинирани и ќе имаат престој одреден временски период. Стационарот „Лана“ располaга и со две возила со по 6 кафези со кои ќе се врши заловување на кучињата по струмичките улици, а таму веќе се згрижени педесеттина кучиња кои се сместени во боксовите.

Во стационарот „Лана“ оперативно работат двајца ветеринарни лекари, 3 ветеринарни техничари, 2 заловувачи и 3 одгледувачи. Процесот на иницијален третман на околу 500 бездомни кучиња од градот и населените места на општина Струмица започнува веднаш, а во текот на следните 2-3 месеци, во соработка со Факултетот по ветеринарна медицина, Сектор за благосостојба и Агенцијата за храна и Ветеринарство е планирано броење на сите бездомни кучиња во општината.

„Со пуштањето во употреба на Стационарот „Лана“ практично почнуваме со решавање на еден од најголемите проблеми на струмичани, а тоа се бездомните кучиња скитници за кои имавме многу несакани ситуации, каснување на луѓе и во неколку случаи на деца. Додека во државата одредени општини декларативно се занимаваат со овој проблем, ние суштински и системски го решаваме и од денеска општина Струмица е единствената општина во државата со свој сопствен стационар за бездомни кучиња. Јас ги уверувам граѓаните дека стационарот ќе ги дава посакуваните резултати. Особено ме радува фактот што веќе ги имаме и првите семејства, граѓани коишто сакаат да вдомат кучиња. Упатувам порака дека колку сме со поголема свест во однос на кучињата скитници и сакаме да ги вдомиме, толку помалку ќе имаме и кучиња скитници на улиците. Ако навистина ги сакаме животните, тогаш да им дадеме дом на сите“ – кажа градоначалникот Костадин Костадинов, кој денеска заедно со претседателот на Советот, Марјан Даскаловски го посетија Стационарот кој е изграден зад Прочистителната станица кај Сачево.

Директорката на Стационар „Лана“, Сузана Стојкова истакна дека овде бездомните кучиња ќе бидат згрижени, но објектот е и место за едукација и средби на љубителите на животни, место каде ќе се разговара за правата на животните и ќе се учи како да се покаже благодарноста кон кучињата.

Стационарот „Лана“ е резултат на повеќегодишната иницијатива и заложба на Центарот за развој на Југоисточниот плански регион кој го изгради и обезбеди возила за заловување на уличните кучиња. Требаше да функционира како регионално претпријатие, но по последните Локални избори новоизбраните градоначалници одлучија основачките права да ѝ ги префрлат на Општина Струмица, која покажа интерес да има свое јавно претпријатие за таа намена.