И годинава пак беа убави, во свој стил на модната писта – „Убави сме, свои сме 2024“

И годинава пак беа убави, во свој стил на модната писта, радосни што повторно се чувствуваа свои чекорејќи со партнери, а тоа пак им го озвозможи Анче Туфекчиева и Здружението за помош и поддршка на лицата со Даун сидром „Вера“ од Струмица. На модната писта, облечени во креации од познати бутици и модни брендови децата со попреченост, поддржани од публиката во преполнетата сала на Центарот за култура „Антон Панов“ во Струмица ја направија пак своја 8-та манифестација „Убави сме, свои сме“, веќе брендиран настан и заштитен во Агенцијата за авторски права на Република Македонија.

Ангелина, Панче, Мила, Максим, Дамла, Јагмур, Иван, Зорица, Трајче, Јана, Јована, Димитар, Антонија, Вања, Ена, Стојче, Филип, Илина, Марија, Ингрид, Стефан и „заштитното лице“ на настанот Верче Туфекчиева… сите беа во свој ритам, а во исти ритам беа и нивните партнери, познати јавни личности од културата, здравството, бизнисот, политиката…

Не беше само модна ревија, настанот имаше и музичко-забавен карактер со настап на деца од градинката „Виножито“, од училиштата „Сандо Масев“ и „Видое Подгорец“ од Струмица, од Посебното училиште „Св. Климент Охридски“ од Ново Село, со музички изведби на Симона Петрова, Марија Панчурова, Томе Лазаров со синот Константин и ќерката Вања.

„Секоја година сваќам дека уствари зборот посебни потреби го имаме сите, затоа да ја славиме различноста и да бидеме сите лица со посебни потреби“ – кажа организаторката Анче Туфекчиева, обраќајки и се на публиката присутна на годинашната манифестација „Убави сме, свои сме“.

Овој настан ја прославува една од најважните вредности во нашето општество – инклузивноста. Настанот е можност да се покаже дека различностите не се бариера, туку едно големо богатство. Децата со поинакви способности, како и сите деца имаат неограничен потенцијал, тие се едни од најхрабрите, најсреќните, најекспидитивите личности кои со својата автентичност и љубов му даваат на светот поубаво место за живеење.

ФОТОГАЛЕРИЈА