По утринската Света Божествена Литургија, денеска од пред Црквата „Свети Димитриј и Свети Григориј Палама“ иконата на Пресвета Богородица Брзопослушничка, која вчера беше изнесена од Манастирот „Свети Петнаесет“, продолжи со свечена Литија низ улиците на Струмица до плоштадот „Гоце Делчев“.
Пред поголем број верници на плоштадот се одржа молитвословие, а во присуство на Митрополитот Тетовско-гостиварски г. Јосиф и Епископот Делчевско-Каменички г. Марко со свештеници на Македонската Православна Црква – Охридска Архиепископија. Поздравно слово одржа Викарниот епископ Јаков Стобиски.
„Еве не, не само денес, туку и вчера и завчера, одиме по стапките на нашите предци, нашите татковци, мајки, баби и дедовци, кои чекореа по Мајката Христова и Мајката наша и никогаш не оддалечувајќи се од неа, заради тоа што нашиот народ многу добро знае дека оддалечувајќи се од Пресвета Богородица, се оддалечуваме од оној што го држи во своите мајчински прегратки“ – кажа епископот Јаков.
По свеченоста, иконата беше вратена и оставена во Црквата „Свети Димитриј и Свети Григориј Палама“ за поклонение на верниците во наредните десет дена, а потоа пак ќе биде вратена во „Свети Петнаесет Тивериополски свештеномаченици“.
Вериниот народ утринава имаше можност да се причести со Светите Христови Тајни и да се поклони пред светите мошти на Свети Василиј Велики, Свети Стефан Првомаченик и Свети Гаверил Епископ Велички.
Инаку, во март 2017-та година, од Света Гора иконата беше донесена во манастирот „Светите Петнаесет Тивериополски свештеномаченици“, како подарок на градот Струмица од светиот игумен на Свештената Обител Дохијар, Старец Григориј со своето во Христа братство, во знак на спомен на чудото што Пресветата Владичица наша Богородица го направила во 2016-та година над 18-годишно немо момче од Струмица, враќајќи му го говорот во целост.
