Исчистен е просторот од некогашната „маларична“ болница на влезот во Турското маало во Струмица. Таму освен болницата имаше и дивоградби. Сега целиот тој простор е подготвен за изградба на спортско игралиште, а еден дел ќе биде паркинг.
Градоначалникот Костадин Костадинов со своите соработници денеска беа да го видат расчистениот простор. Тој е задоволен од завршениот прв чекор од овој проект и им се заблагодари на граѓаните за поддршката и разбирањето.
„Првиот чекор беше расчистување на теренот и тоа е веќе завршено, јас сум благодарен за трпението од жителите во Турското маало, за разбирањето на жителите од овој дел на градот, оти секое рушење само по себе не е благодарна работа, имаме различни постапки, законски рокови коишто мораме да ги испочитуваме, но еве сведоци сме дека сето тоа заврши“ – кажа Костадинов.
Според проценките што ги има направено Одделението за урбанизам околу 6 милиони денари ќе се потребни за изградба и уредување на овој простор, односно изградба на спортско игралиште и паркинг за автомобили и автобуси. Градоначалникот Костадинов најави дека до крајот на овој месец ќе има ребаланс на буџетот и очекува дека огромен дел од советниците ќе дадат поддршка за да се предвидат средствата и да продолжи постапката за реализација на проектот.
