![almak](https://strumicanet.com/wp-content/uploads/2023/09/Almak10_2023.jpg")
Јубилејната петнаесетта книга на македонскиот фолклорист Иван Котев „Наведе́ се с’нце да зајде“, пред недела дена излезе од печат, а нејзината промоција ќе се случи овој месец. Котев, кој повеќе од половина век собира и проучува фолклорен материјал од Струмичко, ја посветува оваа книга на неговото родно место, струмичкото село Робово. Во најновата книга на Котев се поместени песни, приказни, поговорки, кажувања, информации за празници, обичаи и друго, кои оваа книга ја прават значајно дело за културно-историското наследство на Робово. Ова е втора книга на Котев за неговото родно село, по издадената во 1995 година „Училиштето во Робово од преродбата до денес“, која ја следи историјата на училишното дело на ова село, која е особено значајна затоа што, според познатите историски податоци, Робово е првото место во струмичкиот крај во кое се отвора преродбенско училиште.
По повод издавањето на неговата најнова книга, Радио СтрумицаНет направи интервју со Иван Котев. Во интервјуто, струмичкиот Димитар Миладинов или Марко Цепенков на нашето време, чичко Иван зборува за јубилејната книга, како и за неговата полувековна собирачка и проучувачка дејност, присетувајќи се на почетоците, како и на љубовта кон народното творештво, всадена кај него уште од рани години од неговите родители, робовчаните Савета и Илија Котеви, на кои и им ја посветува новата книга. Теренската работа на Котев содржи многу искуство и запознавање со многу луѓе. Тој со восхит раскажува за неговите информатори. Некои од нив на доцни години, во постела, се нафатиле да му го пренесат народното творештво, за истото да биде овековечено.
Архивата на Иван Котев е полна со материјал што допрва треба „да види бел ден“. Тој веќе работи на неколку нови книги, една од нив е и вториот том на „Мудроста на вековите“. Поголем дел од творештвото на Котев е издадено во последните неколку години.
„Книгата „Наведé се с’нце да зајде“ (Фолклорни и етнолошки материјали од село Робово, Струмичко, Струмица 2022г.) е дело со кое Котев, на најдостоинствен начин му се оддолжува на родното место. Оваа книга претставува пребогат извор на автентични теренски материјали за народното творештво и народниот живот на село Робово, навидум еден мал локален простор, но со огромна културолошка вредност. Ова вредно дело укажува на потребата од расветлување на ваквите мали сокриени и маргинални места на географската карта на Македонија, но места на кои се случувале значајни настани што народот ги засведочил и ги конзервирал во песна, приказна, легенда, предание, кажување… Сериозниот пристап поткрепен со научна акрибија, го прави Котев човек кој, не само што запишува и дешифрира материјали од терен, туку и истражувач кој го проучува фолклорот и изложува свои тези поврзани со него“, пишува рецензентката на книгата, професорката Ана Витанова Рингачева. (К.Ѓ.)
