„Учеството на сите граѓани во општествените и политичките процеси е предуслов за градење на демократски систем во било која држава. Македонија е демократска земја, но исклученоста на една група граѓани од политичкиот живот, укажува на фактот дека не се создадени услови за почитување на најважниот принцип во демократскиот систем – еднаквоста. Еднакви политички права, како и поддршка и прифаќање во политичкиот живот за лицата со попреченост е пресудна за нивната потполна партиципација и учество во сите други процеси. Вклучувањето во политичкиот живот на лицата со попреченост треба да биде еден од главните приоритети на институциите и политичките партии“, ова беше кажано на работилницата која ја организираше Здружението за промоција и развој на инклузивно општество „Инклузива“, која од 29 септември до 1 октомври ја организираше за членовите на „Мобилност“ во Струмица, а во рамките на проектот „Еднакво учество на лицата со попреченост во политичкиот и јавниот живот“.
На работилницата беа опфатени теми за Политичко учество, Лидерство и Застапување. Преку интерактивни дискусии за начините како лицата со попреченост можат активно да учествуваат во политичкиот живот на земјата, акцент беше ставен на важноста од нивното политичкото учество и активизам како набљудувачи, гласачи и кандидати на листи за пратеници и советници, како и учеството во креирањето на политики на локално и државно ниво.
Потребите на лицата со попреченост многу ретко се на врвот на политичките агенди, особено во места каде ресурсите се ограничени. Како резултат на тоа, има многу малку инклузивни програми и услуги за лицата со попреченост. Онаму каде што попреченоста е опфатена во политиките, имплементацијата е често слаба и како резултат на тоа сè уште има многу бариери во општеството за овие граѓани.
Повеќе од 7 години, Здружението за промоција и развој на инклузивно општество „Инклузива“ ги насочува организациските напори и ресурси кон овозможување на соодветни услови за политичко и изборно вклучување на лицата со попреченост. „Инклузива“ има спроведено различни активности за изборно и политичко учество на лицата со попреченост, како што се едукација на гласачите, градење капацитети на изборните институции, но она што е најважно, „Инклузива“ е единствената акредитирана организација во регионот на Западен Балкан која ги следи изборите од аспект на правата на попреченост.
