Милош Кецојевиќ (40) од селото Јосифово, општина Валандово, по втор пат користи помош од ИПАРД програмата. Прв пат добил во 2012-2013 година и сега, во 2023 година. Од првото аплицирање добил „атомизер“ и „мулчер“, а од последното аплицирање трактор „Cararo“, фреза и меѓуредна машина во вредност од околу 50.000 евра.
За можноста да ја користи помошта од ИПАРД дознал преку интернет и вели дека немал проблеми при аплицирањето и се поминало во најдобар ред. Добил 70 отсто поврат на вложените средства, бидејќи, како што вели, тогаш бил помлад и му следувал поголем поврат на средствата, кој бил исплатен во предвидениот рок.
„Најмногу ми помогнаа од Агенцијата за унапредување на земјоделството при ПЕ на Министерството за земјоделство, шумарство и водостопанство во Валандово. Машината ми е наменета за оревите кои ги имам посадено на 2 хектари, односно околу 450 садници, потоа имам калинки на 1,5 хектар и имам лозов насад на околу 2,5 хектари на кој одгледувам сортно грозје „Модaвија“, вели Кецојевиќ.
Обемната документација најголем проблем за фармерите
Кецојевиќ потенцира дека конкурира два пати за добивање механизација од ИПАРД, се му е познато, но најмногу му смета обемната документација.
„Потребно е да се подготви обемна документација, треба многу внимание, но со посветеност и помош од надлежните се стигнува до целта. Едноставно, условите во огласот мора максимално да се почитуваат и да се внимава. Секако помошта од консултантите е немерлива, но мене ми беше малку полесно, бидејќи по професија сум правник и тоа многу ми помага. Верувам дека им треба повеќе помош на обичните земјоделци за да можат да ја подготват обемната документација“, смета Милош.
Им порачува и на другите земјоделци да конкурираат на ИПАРД програмата, но како што вели на огласот на кој тој ја добил механизацијата било дозволено да се аплицира само за механизација со мотори „еуро 5“.
„Кај повозрасните постои одбојност кон овие еколошки мотори. Сите би сакале „еуро 3“, но правилата за ИПАРД се построги и мора да се почитуваат. Сепак, од страна на добавувачите треба да се обрне малку повеќе внимание за обука на специфични трактори, како што е мојот, бидејќи од упатството тешко се учи. Овие трактори имаат компјутерски софтвери и не е баш едноставно. Можеби би требало да се организира обука во траење од десетина денови“, посочува Кецојевиќ.
Опремата од ИПАРД ми носи продуктивност, вели Васко од Јосифово
Потенцира дека со опремата од ИПАРД се зголемува продуктивноста во работењето, но со нив треба да се користи и европска дополнителна механизација, на пример култиватори, бидејќи тогаш може да се обработи поголема површина.
„Тракторот е мошне силен, има 75 коњски сили и доколку му додадеш друга механизација без проблем ќе работи и ќе биде мошне продуктивен“, вели Кецојевиќ.
Тој им препорачува на земјоделците да аплицираат и да ги користат средствата од ИПАРД, бидејќи самите средства се вредност и помагаат да се зголеми профитот.
Во Јосифово и други земјоделци се корисници на средства од ИПАРД, но како што вели нашиот соговорник треба поголема информираност и да се надмине бариерата дека правилата се строги и дека тие треба да се почитуваат.
Во процесот на аплицирање за ИПАРД ми помогнаа МЗШВ и АПРЗР, вели Танчев
Васко Танчев од валандовско Собри од март 2021 година ја користи помошта која ја доби преку ИПАРД програмите за осовременување на земјоделското производство. Имено, откако заедно со син му дознале за можноста да добијат таква помош, во неговиот двор е паркирана големата тракторска приколка од 4 тони и депозитерот за губрење.
Вели дека најпрвин ја набавил опремата, односно ја платил сумата од 240.000 денари, а потоа преку ИПАРД му се вратени парите во износ од 60, односно 70 отсто.
„За 1.500 евра добив и приколка и депозитер, односно толку изнесуваше моето учество. За да конкурирам ми помогнаа во Подрачната единица на Министерството за земјоделство, шумарство и водостопанство во Валандово, односно преку Агенцијата за унапредување на земјоделството. Ги собрав сите документи и со нивна помош успешно аплицирав, вели Васко.
Додава деке е повеќе од задоволен од добиената помош.
„Ќе почне бербата на винското грозје не можеш да најдеш приколка. Барав да купам тука, но за скоро искршени приколки бараа по 1.500 до 2.000 евра. Аплицирав и по 4-5 месеци ми се јавија за да склучам договор во Скопје. Потоа дојде комисија и по неколку денови средствата ми беа исплатени“, додава Васко.
Смета дека на прв поглед можеби изгледа дека лесно се добива бараната помош, но потребно е да се пополнат голем број на документи, но, како што вели, кога има кој да го води целиот процес ништо не е тешко.
Планира да набави „мулчар“ за да ги дробе лозовите гранки
Следно за што рамислува Танчев е да конкурира за набавка на машина „мулчар“, со која гранките по кроењето на лозјето се дробат и остануваат во почвата.
Упати апел до сите земјоделци да конкурираат, бидејќи се што се добива од ИПАРД програмата е добро и корисно.
Гроздовите од неговите 12 декари винско лозје сега полесно ги собира и ги превезува со приколката. Тоа што му било најпотребно го добил – тракторската приколка и депозитарот за губрење ќе ја чекаат новата производствена сезона.
