„Златна потковица“ на „Астерфест 2023“ на данскиот филм „ИВАЛУ“ (IVALU) од авторите Андерс Валтер и Пипалук К. Јоргенсен

Стручната жири комисија на годинашното 18-то издание на Интернационалниот филмски фестивал „Астерфест“, во состав м-р Гоце Ристовски (писател и универзитетски професор), д-р Дрита М. Фазлија (филмски продуцент и универзитетски професор) и Мили Чумиќ (филмски продуцент и дистрибутер од Велика Британија), по опстојна расправа за сите 23 филмa во официјалната конкуренција прикажани на „Астерфест“, донесе едногласна одлука, наградата „Златна потковица“ да ја додели на филмот ИВАЛУ (IVALU) на авторите Андерс Валтер и Пипалук К. Јоргенсен од Данска.

Наградата „Сребрена потковица“ ја доби филмот ЕЖ (HEDGEHOG) на авторот Д. Митри од САД, додека „Бронзена потковица“ на филмот ШТИПЕЊЕ (PINCH) на авторките Еми Патмор и Ана Дворжак од Австралија.

Наградата „Ѓорѓи Абаџиев“ за сценарио се доделува на авторката Александра Кардалевска за македонскиот филм СЦЕНАРИОТО (THE SCRIPT). Наградата „Ацо Алексов“ за режија се доделува на авторот Дејан Ангелов за филмот ЗАДАЧА (TASK) од Бугарија. Награда за филм од македонската продукција се доделува на македонскиот филм ЗВУКОТ НА ТИШИНАТА (THE SОUND OF SILENCE) на авторката Анастасија Лазарова Пилинг. Награда за студентски филм се доделува на НОВИОТ ПОЧЕТОК (THE NEW BEGINNING) на авторката Тања Симоновска.

Специјална награда за современ третман на традиционалните семејни вредности се доделува на филмот „Ирско збогување“ (AN IRISH GOODBYE) на авторите Том Беркли и Рос Вајт од Велика Британија.

Специјална награда за инвентивен ведар пристап кон теми што говорат за глобалната состојба на психоза во современиот свет се доделува на македонскиот филм „Тале и Корона“ (TALE AND CORONA) на авторoт Томислав Алексов.

Специјална награда за придонес во разоткривањето на ефектите од алтернативниот уметнички креативен пристап наспрема конвенционалниот живот се доделува на македонскиот филм „ЛУКА“ (LUKA) на авторот Ице Виранов.

Вечерва во Амфитеатарот во Струмица во 20:30 часот „Астерфест“ проекција на „Планината на гневот“, по повод 5 години од смртта на режисерот Љубиша Георгиевски. Проекција на реставрираната верзија во соработка со Кинотеката. Култен македонски филм во кој игра Ристо Шишков.