Од денеска возниот парк на Итната медицинска помош е зголемен за уште едно амбулантно возило опремено со неопходни медицински апарати за итни случаи со кое дополнително ќе се олесни давањето итна помош на граѓаните од струмичкиот регион. Со новото возило Службата за Итна медицинска помош во Струмица располага со пет амбулантни возила и две возила за домашна посета.
Пратеникот во македонското Собрание од Струмица, Миле Цеков денеска ја посети Службата за Итна медицинска помош и за медиумите изјави дека после реализирање и решавање на проблемот со Дојранското езеро, втор приоритет на партијата која тој ја застапува – Движењето ЗНАМ, е набавката на новото амбулантно возило за потребите на ЈЗУ „Здравствен дом“ Струмица, реконструкцијата и модернизација на здравствената установа која е, како што кажа, во многу лоша состојба.
„Во контактот што го остварив со повеќе амбасади, побарав поддршка за реконструкција на фасадата на цела установа и истата до крајот на годината ќе се реализира. За четири месеци новиот менаџмент во ЈЗУ „Здравствен дом“ Струмица набави ново амбулантно возило, започна со обновување на покривот кој протекуваше, започна со обновување на паркиралиштето кое беше полно со дупки, почна со обновување на дел од внатрешните простории. За само четири месеци граѓаните ќе видат дека со остаток на буџетот од 2024 година ќе се направи повеќе од она што се правело за целогодишни буџети претходно“ – кажа пратеникот Цеков, упатувајќи честитки до вработените и директорот на ЈЗУ „Здравствен дом“ Струмица, д-р Сашо Молчанов.
