„Здрава котлина“ алармира – црн густ чад на улицата „Антон Панов“ во Струмица

На Фејсбук страницата на Еколошкото друштво „Здрава котлина“ попладнето објавени се фотографии во кои се гледа црн густ чад на улицата „Антон Панов“ во Струмица. Нешто гори, а гостиот облак од црн чад станува неподнослив за дишење.

„Полицијата со инспекторите мора да реагираат за ефективно решавање на ваквиот безобразлук. Ова нема никаква друга смисла освен отворена провокација“ – стои во објавата.

Подоцна на Фејсбук страницата на градоначалникот Костадин Костадинов е објавено дека на улицата „Антон Панов“ во Струмица имаше запалено оган од различен вид на отпад на отворено, но на опожареното место не е затекнато лице.

„Од страна на комуналните редари е повикана противпожарна екипа за да не настане негово проширување на која навремено е интервенирано од нивна страна“ – стои во објавата.

Реагираше и пратеникот на ЗНАМ од Струмица, Миле Цеков со објавување на видео снимка, осудувајќи го овој чин на улицата „Антон Панов“.

„Ова е крајно безобразно и заслужуваат казна! Инспекторите мора веднаш да реагираат, впрочем за дивоградбите на „Антон Панов“ има и судски одлуки дека се бесправно градени објекти, но истите се приклучени и на канализациска и водоводна мрежа, како и на мрежата на ЕВН“ – стои во објавата на Цеков.