Завршија „Средбите под јаворите“ – Колешино полно со деца и писатели

Заврши 22-то издание на тридневната литературна манифестација „Средби под јаворите – Видое Подгорец 2023“, која во изминатите три дена се одржуваше во Струмица и родното место на големиот македонски писател Видое Подгорец, во селото Колешино.

Вчера, на денот кога е роден Видое Подгорец, а ако беше жив ќе полнеше 89 години, училишниот двор и селото Колешино беа полни со многу ученици од повеќе градови и села на Македонија. Беше полно и со писатели, со ликовни уметници, со наставници, децата во природа цртаа, пишуваа, читаа поезија, раскази, беа актери, имаше и облечени во карневалчиња.

Познатиот сликар Живко Поповски – Цветин црташе со децата, но им подари и многу цветови насликани на хартија, разменуваше и по некој збор со нив. А една долга слика од Цветин си доби и нашиот познат фолклорист Иван Котев, кој беше дел од ова манифестација. Децата имаа можност да го запознаат и да се фотографираат со најблискиот пријател на Подгорец, писатетелот Киро Донев. Тие со своите наставници ја посетија и куќата во која се родил и живеел Видое Подгорец. А покрај учеството на манифестацијата, децата имаа можност да го посетат и Колешинскиот водопад. Беа доделени признанија и благодарници на помагатели, учесници, пријатели, институции. Организаторот, на сите учесници и гости им посака со добро здравје догодина пак да дојдат на уште едно традиционално литературно дружење.

„Средби под јаворите – Видое Подгорец“ годинава се дел од „Струмица Опен фестивал“, со поддршка на Општина Струмица, а освен Струмица оваа манифестација финансиски ја поддржа и Општина Ново Село.

• На вториот ден од „Средби под јаворите“ – книжевна трибина и средби на писателите
• Избрани најдобрите библиотекари – „Библиотеката темел на писменоста“

Видое Подгорец е еден од најплодните македонски писатели, патописец, поет, раскажувач и романописец за деца и возрасни. Припадник е на втората генерација македонски писатели. Објавил голем број стихозбирки, раскази и романи. Роден е на 8 јуни 1934 година во струмичкото село Колешино, во сиромашно семејство. Во родното село завршил основно училиште, а во 1950 година завршил учителска школа во Штип. Потоа, со неполни 16 години почнал да работи како учител. Поради сиромаштијата, не бил во состојба редовно да ги следи предавањата на Скопскиот универзитет, па затоа, студирал како вонреден студент. Во 1956 година, дипломирал на Вишата педагошка школа, а во јуни 1959 година дипломирал на Филозофскиот факултет, на групата за југословенска книжевност. Потоа, три години работел како училиштен инспектор за Штипската околија, а во 1962 година се вработил во Скопје, во „Нова Македонија“, т.е. во редакцијата „Детска радост“, како уредник на детските списанија „Другарче“ и „Наш свет“. Својот работен век го завршил како директор и главен уредник во НИК „Наша книга“. Починал на 14 април 1997 година во Скопје. Бил член на Друштвото на писателите на Македонија од 1958 година.