Елеуса Фондација и оваа година започна голема Хуманитарна акција под мотото „Сподели дел од својата трпеза, нахрани гладен“. Во поголемиот број маркети низ Струмица поставени се корпи во кои граѓаните може да оставаат прехранбени продукти, кои потоа ќе бидат доставени до најсиромашните наши сограѓани.
Корпите со препознатливото лого на Елеуса Фондација и мотото „Сподели дел од својата трпеза – нахрани гладен“, поставени се низ маркетите на Стокомак, Киси Трејд, Кит Го, Зендолино, Црвена Ружа, Тинекс и Голд маркет.
„Огромна благодарност упатуваме кон нашите партнери чиј број се зголемува од година во година. Општествено одговорните компании од нашата заедница не ги забораваат луѓето кои страдаат. Така и овојпат маркетите со големо срце, отстапија простор за корпите во кои граѓаните може да ги оставаат донациите во храна или средства за хигиена“, појаснуваат од Фондацијата додавајќи дека целта е оваа хуманитарна акција да нѐ направи сострадални.
„За жал, бројот на гладни наши браќа и сестри секојдневно расте. Оваа кампања е со цел да ни ги отвори срцата да сострадуваме и да покажеме дека во нас сè уште има љубов и дека не сме го изгубиле човечкото, дека не можеме да бидеме спокојни што некој заспива гладен, дека не ни е сеедно што има дечиња кои поминуваат со еден оброк или без ниеден“, велат од Елеуса Фондација.
Собраната храна ќе биде употребена во подготовка на Велигденските пакети кои ќе ги добијат околу двесте семејства во Струмица и населените места кои гравитираат кон Струмичката Православна епархија.
„Нашата Фондација подели над двесте божиќни пакети со храна и средства за хигиена во вредност од најмалку 10.000 денари. Сакаме, особено пред големите христијански празници, да ги посетиме сиромашните семејства и да им помогнеме да ја почувствуваат празничната радост, без да мислат како ќе го поминат денот, така што до средината на април повторно ќе испратиме над двесте пакети“, додаваат од Фонадацијата.
Секој што сака да придонесе во остварување на хуманите цели може да се обрати на електронска пошта: [email protected] или на телефонскиот број: 078 218 660.
Отворени се и сметките:
Денарска жиро-сметка: 300030000262856 Комерцијална банка
Фондација ЕЛЕУСА Струмица
Цел на дознака: Донација
Девизна сметка:
KOMERCIJALNA BANKA AD SKOPJE
BRANCH STRUMICA MACEDONIA
SWIFT: KOBS MK 2X SRB
Beneficiary Customer:
IBAN: MK07300701003869006
FONDACIJA ELEUSA STRUMICA
Kiril i Metodij 24 STRUMICA, R. MACEDONIA
