Д-р Манчев: Неопходен е прием на медицински лица во Службата за Итна медицинска помош за поквалитетна услуга кон граѓаните

ЈЗУ „Здравствен дом“ Струмица ќе работи на добивање согласност за вработување на дополнителен медицински персонал неопходен за нормално функционирање на службите при оваа здравствена установа, најави директорот на ЈЗУ „Здравствен дом“ Струмица, Кирил Манчев.

„Неопходен е прием на лица во Службата за Итна медицинска помош за да може да функционира. Веќе подолг период кадарот во „Здравствен дом“ е многу оптеретен и истиот заслужува пофалба за нивната посветеност. Дополнителен персонал е потребен за да може да се обезбеди и примарна здравствена заштита во рурални подрачја“, вели директорот Манчев кој се вклучува при теренски прегледи и интервенции за да се компензира недостатокот од медицински лица. Тој како лекар, деновиве беше вклучен и во мобилната екипа на „Здравствен дом“ за да се одговори на барањето на МВР за медицински прегледи пред физичките проверки на полициски службеници од Струмица, Гевгелија, Валандово и Радовиш.

Директорот на ЈЗУ „Здравствен дом“ Струмица се надева дека Министерството за финансии наскоро ќе одобри средства за дополнителни вработувања, како и дека ќе добие поддршка од граѓани и приватниот сектор се со цел оваа здравствена установа пружа многу поквалитетна услуга на граѓаните.

Доктор Манчев посочи дека ЈЗУ „Здравствен дом“ Струмица работи и на подобрување на безбедноста на оваа институција. Во наредниот период ќе се инвестира во противпожарна заштита, што е дополнителен предизвик, бидејќи финансиските средства секогаш се ресурс кој не е доволен.