Општинското основно училиште „Св. Кирил и Методиј“ во Дабиље се вклучи во едукативната кампања „Бидете херои на чесноста“ предводена од страна на Државната комисија за спречување на корупција (ДКСК), која е дел од Активност за антикорупција и интегритет, проект што го спроведува Канцеларијата на Меѓународната фондација за изборни системи (ИФЕС) во Скопје, со финансиска поддршка од УСАИД.
„Од досегашната кампања можам да кажам дека децата се многу свесни за корупцијата, бидејќи на почетокот правиме анонимна анкета и поставуваме неколку прашања – дали се сведоци на незаслужени оценки, дали некој фаќа врски во училиштето, кому се обраќаат кога имаат проблем и друго. Заклучокот од сето тоа е дека поголем број од нив, некаде од 70 до 90 отсто одговориле дека се сведоци на такви појави и дека родителите најчесто фаќаат врски тие да ги добијат оценките и кога имаат проблем најчесто се обраќаат кај своите родители“, кажа претседателката на Државната комисија за спречување на корупција, Билјана Ивановска.
За успешноста на кампањата се грижат и актерите Игор Ангелов и Фисник Зекри, кои на начин близок до учениците ги презентираат лошите страни на корупцијата и добрите страни на одговорноста и чесноста. За сценариото е задолжена Елеонора Венинова, која на вешт начин на дечињата им ја спојува забавата и едукацијата.
Начинот на кој се води едукативната кампања „Бидете херои на чесноста“, создава „херои“ кои засекогаш ќе ги запаметат пораките кои им се упатени и ќе ја надградат личната, а со тоа и колективната совест.
Кампањата има за цел одблиску да им се прикажат на децата негативните влијанија од коруптивните потфати и штетите кои ги предизвикуваат. Исто така, целта е тие, како поединци да имаат нулта толеранција кон луѓето кои подведуваат на корупција, а со тоа и да ги охрабрат да пријавуваат какво било коруптивно дејство.
