Дополнителниот заменик министер за финансии, Елена Петрова во посета на струмички компании

Дополнителниот заменик министер за финансии во техничката Влада, Елена Петрова денеска беше во посета на неколку струмички компании. По средбите таа имаше прес конференција на која информираше за денешните активности и разговорите со бизнисмени, но и со раководството и членови на Општинскиот комитет на ВМРО-ДПМНЕ во Струмица.

„Можам да заклучам дека предизвиците на компаниите се слични, лошите економски политики, лошите одлуки или ненавремено донесени одлуки се одразуваат погубно врз некои сектори и индустрии, како на пример овде во Струмица добивме информација дека и градинарството, нешто што е традиционално за струмичкиот регион е во големо опаѓање и изумирање заради начинот на производство којшто се применува. Новата Влада на ВМРО-ДПМНЕ ќе  мора да има мерки и политики на долг рок којшто ќе постават еден сосема нов правец кој ќе создаде основа за одржлив економски развој, значи не само директни економски мерки и политики, туку мерки и политики во образованието за да се создаде работна сила со соодветни компетенции, демографски мерки и политики, мерки и политики во заштитата на животната средина, исполнување други стандарди коишто од нас би ги барале странските деловни партнери кон кои треба да се шират македонските производи“, кажа Петрова.

Дополнителниот заменик министер за финансии во техничката Влада истакна дека горлив проблем за компаниите се и бирократските бариери во администрацијата и видливата корупција.

„Времето за бизнисот е пари, а компаниите чекаат со години за завршување на процедури во администрацијата, а за тоа време стојат нивните инвестиции. Компаниите немаат предвидливост и стабилност во нивното работење. Значи неопходно е реструктуирање и модернизација на јавната администрација, особено преку дигитализацијата за да се овозможи поголема ефикасност на сервисот од админстрацијата и да се намали корумпираноста“ кажа Петрова.

Таа најави дека новата Влада на ВМРО-ДПМНЕ ќе обезбеди една цврстина во управувањето со јавните финансии, односно една силна фискална дисциплина.