![almak](https://strumicanet.com/wp-content/uploads/2025/08/srnet-banner-sofa-bed-garnituri-2025-1-optimized.jpg")
Денеска вкупно 68 талентирани ученици од струмичките основни и средни училишта на свечен начин ги добија сертификатите за стипендија од Општина Струмица и Фондацијата „Заев – Едно општество за сите“. Стипендијата изнесува 2.500 денари за учениците од средните и 2.000 денари за учениците од основните училишта во траење од 9 месеци.
Општина Струмица веќе втора година по ред го распишува Јавниот повик преку кој дава стипендии на најталентираните деца од основно и средно образование во општина Струмица со цел да ги мотивира и учениците да продолжат да ги даваат успесите. Тие за оваа учебна година доделија 45 стипенди од кои 25 за ученици во средното образование и 20 ученици во основното образование.
„Кога зборуваме за плодна соработка, за потпишани меморандуми, особено драг е меморандумот којшто го имаме потпишано со Фондацијата „Заев – Едно општество за сите“, којшто треба да биде мотив и за останатите луѓе, организации, за целиот граѓански сектор, дека само по себе Општината, општинската администрација, советниците, не можат да сторат ништо, без притоа да имаме на ум дека треба да го сториме она, што всушност е најтешко да се биде во 21 век, да се биде човек, да се има разбирање, да се дава поддршка, да се биде човек којшто мотивира, да се биде човек којшто инспирира и да се биде човек којшто знае и текако да ги препознае и да ги награди успешните луѓе, а во денешниот случај успешните наши струмички деца од основно и средно образование. Драги дечиња, сигурен сум дека таквото признание коешто ќе го добиете и стипендијата што ќе ја добиете како плод на успешната соработка на општина Струмица со Фондацијата „Заев – Едно општество за сите“ ќе ви биде силна мотивација да бидете и понатаму чувари на образот на Струмица“, кажа во своето обраќање градоначалникот Костадин Костадинов, кој заедно со Ева Заева од Фондацијата „Заев – Едно општество за сите“ им ги доделија сертификатите на учениците.
За Ева Заева од Фондацијата „Заев – Едно општество за сите“ која додели 23 стипендии, иднината на нашето општество, иднината на нашата заедница и иднината на секој поединец се заснова на стремежот кон создавање на нови знаења и искуства во текот на образованието, но и потоа.
„Оние кои ги прават активностите на нашата Фондација знаат дека голем број од досегашните активности беа насочени токму кон учениците и младите луѓе. Така беше досега, така и ќе продолжиме во иднина. За среќа ние не сме осамени во таа наша мисија, на истата бранова должина се најдовме и со Општина Струмица, која на чело со градоначалникот Костадинов води грижа за развојот на младите и студентите. Токму поради таа причина решивме да се приклучиме во стипендирањето на талентирани млади основци и средношколци“, кажа Заева.
Од името на учениците стипендисти се заблагодари ученичката Магдалена Мучева, истакнувајќи дека оваа поддршка е од големо значење за нив и нивниот развој.
„Со вашиот голем и безусловен допринос ќе ни дадете можност да се развиваме понатаму и со нашите нови успеси во иднина како идни врвни професионалци и одговорни граѓани на оваа општество да дадеме придонес и на тој начин да возвратиме за укажаната доверба. Ветуваме дека дадената прилика ќе ја искористиме со максимална одговорност и ќе се посветиме на својот развој“ – кажа ученичката Мучева.
