Како дел од настаните кои го најавуваат овогодинешното 19-то издание на филмскиот фестивал Астерфест, синоќа во Europe House во Струмица се одржа настан посветен на краткометражните филмови и авторството.
Настанот го отвори струмичкиот уметник со меѓународно реноме Киро Урдин кој зборуваше за неговиот краткометражен филм „Пишта“. На мини панел дискусијата говореа директорот на овој фестивал Горан Тренчовски и уметникот Васил Михаил. Дискусијата беше проследена со проекција на краткометражните филмови „Пишта“ на Киро Урдин, „Четврток“ на Милчо Манчевски и „Деца“ на Наум Пановски.
Урдин го претстави својот филм посветен на животот на Пишта, легенда на париската населба Монмартр, поранешен француски легионер кој решил да живее како клошар на улиците на главниот град.
„Тој можеше да има големи бенефиции од француската држава како заслужен граѓанин, но го избра патот да биде клошар, да живее слободно во Париз, често под мостови, на улици, на Монмартр, да пие, да спие. Филмот го снимив во многу тешки ситуации. Често лежев меѓу туристите и го снимав, за да не ме фати полиција и да ми ја земе камерата. Во втората фаза јас го дадов филмот на МРТ и 60% од најдобрите кадри дали ми ги украдоа или ги фрлија, тоа не знам, во Македонија сѐ е мистерија. Од полошиот материјал што остана, околу 35%, поголемиот дел од лентите беа измачкани со малтер од кога ми ја правеа куќата. Го зедов тој дел, отидов во Бојана филм во Бугарија, ми го исчистија и со ова што ми остана од Пишта го направив овој филм“, раскажа Урдин.
Говорејќи на темата на настанот, Тренчовски рече дека Астерфест всушност е фестивал на авторите.
„И филмот на Киро Урдин и филмот на Милчо Манчевски „Четврток“ и филмот „Деца“ на Наум Пановски се поврзани со една авторска наративна линија и секој од нив кажува една порака која е мошне важна без разлика на тоа во кое време се создавани. Овие филмови се правени во различно време, но се многу актуелни и универзално порачуваат, даваат една поента која и ден денес е интересна за нас“, рече Тренчовски.
Тренчовски им ги порача на публиката книгите „Short Films: Writing the Screenplay“ (2012) на Патрик Неш и „Documentary Film: A Very Short Introduction“ (2007) на Патрисја Офдерхејде, посветени на краткометражните и документарни филмови.
Уметникот Васил Михаил во своето излагање рече дека кратката филмска форма е специфична како и формите во другите уметности.
„Краткиот филм бара од авторот да се изрази лаконично, есенцијално. Се испоставува дека кратката форма е потешка за реализација затоа што од сето тоа што авторот сака да го каже треба да избере и да го собере во една есенција и да постигне ефект кој можеби би бил посилен отколку истата тема да ја гледаме во еден развлечен долгометражен филм“, рече Михаил.
Низата настани кои го најавуваат овогодинашниот Астерфест започнаа минатата седмица. На Светскиот ден на културното наследство, 18 април, на ТВ ВИС беше прикажана реставрирана верзија на комичниот култен филм „Скитникот“ на Чарли Чаплин од 1915 година. Во саботата, на 20 април, на неформален настан во кафе-барот „Нагоре“ беше претставен најновиот визуелен концепт на претстојното издание на фестивалот кој годинава ќе го носи мотото „Кинореалност ’24“.
Домаќинот Томи Печков рече дека продолжуваат да ја негуваат соработката со Астерфест која трае уште од самото отворање на Europe House во Струмица пред три години. /К.Ѓ./
