Денеска во рамките на реализацијата на мерките и активностите предвидени со оперативниот план „Безбедно лето 2023“, Директорот на БЈБ, Сашо Тасевски заедно со стратешката група при Бирото за јавна безбедност имаше работна посета на Секторот за внатрешни работи Струмица.
Директорот Тасевски на Фејсбук информираше дека од страна на раководството на СВР Струмица, бил информиран за безбедносната состојба на подрачјето, која, како што напиша, е поволна.
„Го нагласив и поздравив фактот што на подрачјето на Секторот за внатрешни работи Струмица во првата половина од 2023 година се расчистени 5 од вкупно пријавени 6 кривични дела „разбојништво“, со што е постигната ефикасност од 83%, а се бележи намалување на пријавените кривични дела „тешка кражба“ и „кражба“ споредбено со првите шест месеци од 2022 година. Во овој дел беше потенцирано дека покрај намалувањето на бројот на пријавени тешки кражби и кражби се бележи зголемување на ефикасноста во откривање на сторителите, споредбено со истиот период лани. Имено, кај кривичните дела кражба ефикасноста е зголемена за 25%“, напиша Тасевски.
На средбата било потенцирана работата на СВР Струмица во рамките на недозволената трговија со дрога, каде што во првите 6 месеци од 2023 година поднесени биле 21 кривична пријава против 22 сторители при што се запленети поголемо количество марихуана, растенија канабис, амфетамин, таблетки МДМА и др.
За работата во областа на недозволената трговија и оружје од почетокот на кампањата „Безбедно лето 2023“, односно од почетокот на јули на подрачјето на секторот регистрирани биле 30 случаи, во кои при претрес на домови и прегледи на лица и возила се одземени разновидна опојна дрога и 7 парчиња оружје, 27 парчиња муниција и пиротехнички средства.
Директорот на БЈБ Сашо Тасевски информираше дека во рамки на посебна оперативна акција, на подрачје на СВР Струмица во првата половина на 2023 година се одземени 80.7 м/³ бесправно исечени огревни дрва, споредбено со истиот период во 2022 година, при што евидентирано е зголемување за 26,15%.
