Со пеење на старата коледарска византиска песна „Вечниот Бог“ низ улиците на Струмица, околу сто дечиња од Струмица и нивните родители, денеска тргнаа во бадникова поворка, од црквата „Св. Кирил и Методиј“, да го најават големиот христијански празник, Раѓањето Христово. Со себе ја носеа иконата која симболично го претставува раѓањето на господ Исус Христос.
Децата дојдоа во зградата на Општина Струмица пеејќи ги стиховите „Свет, свет, пресвет си Господи“, каде ги пречекаа градоначалникот на Струмица, Костадин Костадинов и Викарниот Епископ Стобиски г. Јаков, кои ги даруваа коледарите со пакетчиња и им посакаа добро здравје, а заедно со нив продолжија по улиците на Струмица до плоштадот „Гоце Делчев“, каде се одржа и Бадниковиот концерт.
На овој прекрасен концерт на отворено што го организираа волонтерите на Фондација „Елеуса“, заедно со учениците од Школата за веронаука при храмот „Св. Кирил и Методиј“ и Струмичката Епархија, струмичани имаа можност да уживаат во божиќните композиции со изведба во живо од хор и оркестар од Музичкото училиште „Боро Џони“.
Денешниот свечен настан има за цел, радоста и топлината на Бадник и Божиќ да ја почувствува секое детско срцe.
