Денеска се навршуваат 80 години од убиството на народниот херој Благој Јанков Мучето

14 јули 1944 година. Сабота, пазарен ден во Струмица. Еден од најзлокобните денови што го паметат Струмица и струмичани. На тој ден во таа 1944 година, Струмица остана без најсветлиот лик во својата историја, Благој Јанков Мучето.

Само 19 денови го делеа од Првото заседание на АСНОМ во манастирот Свети Прохор Пчињски, на кој требаше да биде еден од делегатите. Неполни два месеца го делеа Мучето, за  да го доживее првото струмичко слободарско утро. За жал не ги доживеа тие два датума, иако со нетрпение ги очекуваше, но и ги заслужи.

Името Благој, презимето Јанков и прекарот Мучето, останаа да бидат револуционерен триптих и синоним на струмичкиот непокорен дух. Така било во овие изминати 80 години, така ќе остане за вечни времиња.

Народниот херој Благој Јанков Мучето, беше, останува и ќе биде гордост на струмичани.

По повод 80-годишнината од убиството на Благој Јанков Мучето денеска од 10:00 часот пред спомен плочата на влезот од големиот градски парк во Струмица ќе се одржи свеченост на која ќе се одржи реч за животот и делото на Мучето, како и изведба на револуционерна поезија. Пред спомен плочата во големиот парк, а потоа и пред бистата во малиот градски парк ќе се положува свежо цвеќе од претставници на локалната самоуправа, здруженија и политички партии.

„На денешен ден, на 14 јули 1944 година бугарскиот фашистички окупатор во Струмица го убива Благој Јанков-Мучето (3 јуни 1911 – 14 јули 1944) народен херој на Македонија, револуционер и комунистички деец. На неговата мајка не ѝ било да дозволено да го земе телото и да го погреба својот син, а бугарските власти го фрлиле кај реката Тркајна. Но, посмртните останки на Благој потоа се пронајдени и погребани. Мучето бил жесток противник и на политиката на бугарскиот окупатор за асимилација на македонскиот народ“. Ова го има напишано историчарот-кустос Емилија Петковска, сега почината, во својата научна статија со наслов „Струмичкиот народен херој“, која е објавена во зборник на Заводот за заштита на спомениците и Музеј на Струмица во 2014 година.