Даскаловски одржа прес конференција по обвинувањата кон него дека не дозволувал да се вршат измени во Програмата за еднакви можности на мажите и жените

Претседателот на Советот на општина Струмица, Марјан Даскаловски денеска одржа прес конференција по обвинувањата кон него од страна на одредени советници, но и претставници на невладини организации дека тој како претседател не дозволувал да се вршат измени во програми на Општина Струмица во кои се зборува за родовата еднаквост, односно еднакви можности на мажите и жените.

Даскаловски на прес конференцијата потенцираше дека Советот на општина Струмица, ниту било кој Совет во Република Северна Македонија не е ниту законодавна власт, ниту извршна, ниту судска власт и Советите на општините не можат да носат и да менуваат закони, ниту можат да менуваат род, родови во полови или пол во род.

Тој кажа дека советникот Ѓорги Танушев од „Стига е“, како претседател на Комисијата за еднакви можности на мажите и жените, поднесе Предлог програма за 2023 година во кој вели дека треба да имаме родово одговорно образование, спречување на родово-базирано насилство и во име на Комисијата нагласил дека „има потреба од обуки за родово одговорно буџетирање во секоја функционална единица на општинската администрација со цел да имаат соодветен капацитет за формулирање на родово одговорни програми и буџетирање под однос на истите“.

„Ѓорги Танушев сакаше да се направат обуки, а не Марјан Даскаловски. И сега во месец мај, не знам од кои причини тој на седница ми поднесува точка на дневен ред која се коси со Законот и Уставот на Република Северна Македонија. Јас го замолив да ја повлече точката за да направам консултации, и направив консултации и со парламентот и со Министерството за локална самоуправа и тие кажаа дека тоа е противзаконски и не смее таков предлог да се донесе на Совет на општина Струмица“ – кажа Даскаловски, потенцирајќи го предлогот на Ѓорги Танушев во кој барал дефиниција за маж и жена, секаде во Програмата каде што има род да се замени со пол, предлог во наслов глава 2, ако има родово одговорно образование да се замени со полово одговорно образование и секаде во Програмата каде стои „род“ да се смени со „пол“.

Даскаловски кажа дека законски тоа не е дозволено и дека таква програма не може да се усвои. Предложил формирање на работна група составена од тој, како претседател на Советот, двајцата координатори на СДСМ и ВМРО-ДПМНЕ, членовите на Комисијата за еднакви можности, двајца претставници од Општина Струмица, Нела Масалкова и Никола Годев и Ленче Христова од Организација на жените – Струмица, а како што кажа Даскаловски на вториот состанок на работната група присуствувала и претседателката на „Родителски Фронт“, Мариета Дукиќ и била многу коректна во однос на расправата, и според Даскаловски донеле заеднички заклучок дека „тој бил во право и советниците биле во право, а така како што Ѓорги Танушев предлагаше измени не може законски во ниту еден случај“, додаде Даскаловски.

„Се договоривме, бидејќи таа е Програма за еднакви можности на мажите и жените, на некои места, таму каде што има род да се замени според Законот за еднакви можности на мажите и жените, бидејќи Програмата така гласи, тоа е законски“ – кажа Даскаловски најавувајќи дека во среда на седницата на Советот на општина Струмица ќе ја стави како дополнителна точка и така ќе ги усвојат измените на таа Програма.