Управата за јавни приходи ги известува граѓаните – закуподавачи да го пријавуваат доходот кој го остваруваат по основ на издавање во закуп или подзакуп на станбени простории, соби, апартмани, простории за одмор и рекреација (викендици), гаражи, непосредно или преку AirBnb, Booking.com, FB, Кајак и други платформи.
Овој вид на остварен доход од закуп или подзакуп на недвижен имот, подлежи на оданочување со данок на личен доход и истиот треба да се пријави во Управата за јавни приходи преку системот „е-Даночни услуги“.
Основа за пресметување на данокот претставува бруто доходот што сте го оствариле.
Висината на нормираните трошоци со кои може да го намалите остварениот доход изнесуваат:
– 10% од износот на доходот (за неопремен простор) и
– 15% од износот на доходот (за опремен простор)
Пријавувањето на доходот од издавање во закуп или подзакуп на недвижен имот на друго физичко лице, се врши до 10-ти во месецот кој следи по месецот во кој имотот е даден во закуп или подзакуп со поднесување на Електронска пресметка (е-ППД) и докази преку системот е-Даночни услуги e-ujp.ujp.gov.mk
Физичките лица кои издаваат имот имаат обврска доколку не се регистрирани да се регистрираат на системот е – Даночни услуги заради пријавување на доходот и поднесување на електронските пресметки во системот ( е- ППД) до Управата за јавни приходи.
Постапката за регистрација е лесна и едноставна. Единствен услов за регистрирање во системот е даночниот обврзник да има валидна електронска пошта која ќе биде и корисничко име за најава во системот на УЈП и истиот ќе служи за понатамошна комуникација со Управата за јавни приходи.
Даночните обврзници кои сакаат да се регистрираат потребно е на почетната страница на e-ujp.ujp.gov.mk да го одберат копчето Нов корисник – физичко лице.
При Регистрацијата на нов корисник се отвора мени во кое се внесуваат податоците за физичкото лице и понатаму системот го води корисникот чекор по чекор. Откако ќе се пополнат сите податоци кои се задолжителни како и податокот дали корисникот дозволува овластувања од други лица (физички и правни) се прави контрола дали корисникот веќе постои или неговата електронска пошта веќе е регистрирана. Доколку нема таков корисник, на наведената е – пошта по притискање на копчето испрати код, се добива код за верификација. По внесување на кодот, корисникот на електронската адреса добива порака во која се содржи Барањето за регистрација кое треба да биде одобрено и на шалтер во најблиската даночна канцеларија на УЈП. По одобрување на барањето од службено лице на УЈП корисникот веќе има профил на системите на УЈП и слободно може да ги користи електронските услуги на УЈП.
Даночните обврзници кои имаат потреба од повеќе информации или поддршка може да го контактираат Инфо центарот на телефонскиот број 0800 33 000 или да се обратат во Регионалните дирекции/Даночните одделенија на Управата за јавни приходи.
На веб страницата на УЈП може да ја најдат и брошурата за ОДАНОЧУВАЊЕ НА ДОХОД ОД ЗАКУП И ПОДЗАКУП и да ги прочитаат основните правила при пријавување на доходот кој како физичко лице – граѓанин гo остваруваат од издавање во закуп или подзакуп на земјиште, станбени или деловни простории, гаражи, простории за одмор и рекреација, опрема, превозни средства и други видови имот.
