И годинава на иницијатива и во координација на Велосипедскиот клуб „ВК Актив – Струмица”, а во соработка со општините Струмица, Василево, Босилово и Ново Село, по 4-ти пат се организираше еко акцијата „Чисти ридови за сите”.
„Се собравме доволно луѓе, исчистивме доста ѓубре, се рашири една убава позитивна енергија, испивме прекрасно кафе на чист планински воздух, но сепак свесни сме дека искоренувањето на навиките за загадување не оди преку ноќ, а тоа не нé демотивира“, велат организаторите.
И од ЈПКД „Комуналец“ Струмица информираат дека со луѓе и механизација активно се вклучија во еко акцијата „Чисти ридови за сите 4“.
„Со помагањето во собирање на сметот оставен од страна на несовесни граѓани покрај патот за месноста Чам-Чифлик, заедно со еко активисти и невладини организации, во вакви и слични акции кои се секогаш добредојдени и поддржани од страна на ЈПКД „Комуналец“, даваме допринос на сите кои се грижат за чиста и уредена животна средина. Апелираме до сите дека со совесно однесување и поголем број на вакви акции ќе добиеме почиста околина во која вистински ќе уживаме во убавината на природата“, стои во соопштението на струмичкото комунално претпријатие.
