Веќе 32 години градежниците од струмичкиот регион организираат средба и го чествуваат празникот, својот патрон Свети Тома – заштитникот на градежниците. И денеска во Манастирот „Св. Богородица Елеуса“ во Вељуса повторно се собраа, а во чест на патронот на градежниците литургија во црквата служеше отец Стоил Димитриев од Струмичката Епархија при МПЦ-ОА.
Кумот на годинашнава манифестација и организатор на прославата, Игор од „Евроградба Инжинеринг“, кумството за наредната година го предаде на Секторот за урбанизам при Општина Струмица.
Раководителот на овој Сектор, Софија Ристова Патрикова во своето поздравно обраќање и преземањето на кумството кажа дека оваа прилика е одлична за да се изрази благодарност и признание за сите оние кои со својата посветеност, труд и креативност ја обликуваат нашата урбана средина.
„Во прв ред, сакам да се заблагодарам на нашиот градоначалник Костадин Костадинов и на целокупниот сектор за урбанизам во нашата општина. Ваша е заслугата за успешната соработка која ја воспоставивме во последните години. Вашата поддршка и отвореност за дијалог се основа на нашите постигнувања, а заедничките напори се клучни за реализација на амбициозните проекти кои го подобруваат животот на нашите граѓани. Без добра волја и квалитетна комуникација помеѓу нас, не би било можно да постигнеме ни приближно толку многу. Заеднички работиме на изградба на инфраструктурни објекти, социјални станбени единици и јавни простори кои не само што ги исполнуваат техничките стандарди, туку и создаваат чувство на заедништво и иднина за сите нас“ – кажа Ристова Патрикова.
Таа упати повик до сите градежниците, да веруваат во Бога, бидејќи како што кажа, Тој е темелот на сѐ.
„Да не бидеме неверни како Светиот апостол Тома, да си веруваме еден на друг, да продолжиме да работиме заедно, да споделуваме знаење и искуства, и да се поддржуваме во предизвиците што ги носи оваа професија. Заедно, со истата посветеност, можеме да го направиме нашиот град подобро место за живеење“ – додаде Ристова Патрикова.
Со ова традиционална манифестација која секоја година се одржува на 19-ти октомври, а на која присуствуваат архитекти, техничари, градежниците, се одбележува крајот на градежната сезона. Ова е единствена манифестација од ваков карактер во Македонија, односно само струмичките градежници на тој начин го одбележуваат овој празник.
