Голем успех на младите гитаристи од „Боро Џони“ на Guitar Art Festival во Белград, свиреа и со илјада гитаристи на Концертот за рекорд

Младите гитаристи од музичкото училиште „Боро Џони“ од Струмица, Матеј Пиличев, Митеа Горгиева, Борис Митев, Весна Георгиева, Васил Точев, Маријана Малинова, Андреа Цурева, Кирил Рингов и Мила Тодорова сите ученици од класата на професорот Васко Пиличев го освоија третото место на еден од најеминентните натпревари во европа и светот „Guitar Art Festival“ во Белград, Србија.

Младите виртуози на гитара од Струмица беа дел и од концертот за рекорд во центарот на Белград на кој заедно свиреа 1000 гитаристи од регионот со многу познати имиња од светот на музиката.

Покрај овие случувања во Белград од 17 до 19 мај се одржа и IX Конгрес на класични гитаристи на Југоисточна Европа ASEG 2024, со учество на 11 земји од Југоисточна европа, меѓу кои и Македонија, а во нашата делегација беше и професорот по гитара во музичкото училиште „Боро Џони“ од Струмица, м-р Васко Пиличев со неговите ученици кои го презентираа училиштето, Струмица и Македонија. Секоја делегација имаше излагања и концертен дел.

Во македонската делегација покрај Пиличев свои излагања имаа и професорот на музичката академија во Скопје, Дарко Багевски, директорката на ДКЦ Карпош, Билјана Лалчевска Серафимовска и дирекотрот на P.S. Guitar Festival во Кушево, Перо Мулар.