Општинското основно музичко училиште „Боро Џони“ од Струмица го одржа својот завршен концерт, во чест на својот патрон.
На свеченоста беа доделени Плакети и признанија на најуспешните ученици кои со освојувањето на многуте награди во земјава и странство придонеле за афирмацијата на музичкото училиште „Боро Џони“.
И годинава беше доделена традиционалната награда „Најдобар ученик“ од семејството на Боро Џони – Џонови, а ја добија учениците Анастасија Костова, Никита Ѓеоргиевски и Елена Јованова. Наградата на овие талентирани ученици им ја врачи внукот на Боро Џони, Душан Џонов.
За најдобарите ученици во текот на целото нивно основно музичко образование и за покажан исклучителен успех, ООМУ „Боро Џони“ им додели Плакета и признание на деветоодделенците Петар Бунгурџиев и Димитар Филев, по теоретски предмети и Магдалена Мицева и Васја Стојанов, како најдобри во инструменталниот отсек.
„Струмица е горда на Музичкото училиште „Боро Џони“ кое секоја година докажува со факти дека е во самиот врв на македонската основна музичка наобразба. За тоа зборуваат бројните награди и признанија кои учениците, предводени од нивните ментори, ги добиваат на разни државни и меѓународни натпревари, во конкуренција на многу свои врсници од земјата и странство. Тие успеси се резултат на исклучително квалитетна и професионална работа на професорите со своите ученици, но и на големата љубов со која се примопредаваат теоретските и практичните знаења“ – кажа во своето поздравно обраќање градоначалникот на Струмица, Костадин Костадинов.
Најдобрите ученици кои настапувале на домашни и меѓународни натпревари и освоиле повеќе награди, пред струмичката публика во конгресната сала во хотелот „Сириус“ се претставија со дела на познати светски композитори, како и традиционална македонска изворна музика.
На 23 мај 1943 година од страна бугарскиот фашистички окупатор во струмичкиот затвор ѕверски беше убиен и изгорен борецот Боро Џони. Со годишниот завршен концерт, учениците и наставниците го величат и чествуваат животот и делото на својот патрон.
