![almak](https://strumicanet.com/wp-content/uploads/2025/08/srnet-banner-sofa-bed-garnituri-2025-1-optimized.jpg")
Девет претстави, од кои осум со 45 актери ќе бидат во конкуренција за единствената награда за високи актерски достигнувања на годинашното 32-ро издание на меѓународниот Фестивал на камерен театар „Ристо Шишков“, кој секоја година се одржува во Струмица стартувајќи на Денот на независноста на Македонија, 8-ми Септември, а ќе трае до 13-ти Септември.
Жири комисијата во состав: Јордан Симонов – актер на МНТ, Билјана Крајчевска – драматург и режисерот Александар Ивановски меѓу 45-те актери ќе го бара лауреатот за годинава, откако заедно со публиката ќе ги проследат сите осум претстави, а на 13-ти Септември во 23:00 часот официјално и ќе го објават и ќе му ја доделат паричната награда од 1500 евра и златен медаљон со ликот на Ристо Шишков.
Градоначалникот на Струмица, Костадин Костадинов кој е покровител на овој фестивал заедно со Општина Струмица, Министерството за култура и Фондацијата „ЗАЕВ – Едно општество за сите“, отворајќи го фестивалот кажа дека Струмица треба да биде горда што го чува и негува фестивалот како едно од своите најомилени културни чеда, потенцирајќи дека тоа ќе го прави и во иднина во чест на актерите и во чест на бардот на македонското глумиште, неповторливиот Ристо Шишков.
На отворањето на фестивалот синоќа на малата сцена во Центарот за култура „Антон Панов“, на минатогодишниот лауреат, годинава претседател на жирито, Јордан Симонов му беше доделено признанието од 31-то издание, бидејќи минатата година не присуствуваше на доделувањето, како и на најдобриот млад актер од минатата година, Даријан Петров – актер на Народниот театар од Штип.
Со претставата „Црна дупка“ од Горан Стефановски, во режија на Љупчо Ѓоргиевски, а во изведба на домаќините, актерите од струмичкиот театар, претстава која доби три награди на фестивалот „Војдан Чернодрински“ во Прилеп, за најдобра претстава, за најдобра машка улога и за најдобра епизодна женска улога, стартуваше програмата на годинашниот ФКТ „Ристо Шишков“.
Сите претстави ќе се играат на сцените на Центарот за култура „Антон Панов“, а ќе почнуваат во 19:30 и во 22:00 часот. Во рамките на „офф“ програмата на фестивалот во четврток во 12:00 часот ќе има промоција на списанието за култура и уметност „СУМ“, со разговор на тема „Благој Стефановски – лик и дело“.
