Во летната сезона кога се оддржуваат манифестации, концерти, и други случувања на отворено, се среќаваат продавачи на крофни, палачинки, пуканки, пченка, кафе и други слични производи, а се изнајмуваат и спортско-рекреативни реквизити.
Во насока, на усогласување на сезонските дејности со даночната регулатива, Управата за јавни приходи укажува на физичките лица вршители на дејност од времен карактер дека пред отпочнување на нивната дејност потребно е претходно да поднесат Барање за паушално плаќање на данокот на личен доход до Управата за јавни приходи.
Секој кој планира оваа летна сезона да врши некоја од овие дејности најпрво да поднесе барање, па потоа да ја врши дејноста, барањето може да се преземе од веб страната на УЈП или од самите одделенија даночни канцеларии на УЈП.
Пополнувањето на ова Барање е едноставно и брзо односно се внесува матичен број на граѓанинот, адреса, контакт телефон и задолжително се штиклира полето „Времен карактер”. Пополнетото барање се доставува до Регионалните дирекции или даночните одделенија во зависност од местото на вршење на дејност од времен карактер.
За утврдениот данок на личен доход, Одделението за утврдување и регистрација на даноци (РД/ДО) изготвува Решение за утврдување на данок на личен доход (времен карактер), по што во законскиот рок лицето кое врши дејност од времен карактер должно е да го плати данокот на личен доход за периодот додека ја вршело дејноста од времен карактер.
За поддршка или повеќе информации околу оваа обврска може да го контактирате Инфо центрот на бесплатниот телефонски број 0800 33 000 или во Регионалните дирекции/Даночните одделенија на Управата за јавни приходи ширум државата.
