Вработените и учениците во СОУ „Димитар Влахов“ го одбележаа роденденот на својот патрон

Денеска се навршуваат 145 години од раѓањето на македонскиот револуционер, општественик и државник, Димитар Влахов и 77 години од основањето на училиштето. По тој повод учениците и вработените во Средното општинско училиште со ученички дом „Димитар Влахов“ во Струмица, со пригоден говор и културно-уметничка програма, на достоинствен начин го одбележаа патрониот празник на училиштето.

СОУУД „Димитар Влахов“ е основано во далечната 1946 година како Средно земјоделско училиште во Струмица, а во првата учебна година имало 42 ученици. Денес е модерна образовна институција со земјоделско-ветеринарна, хемиско-технолошка, угостителско-туристичка и здравствена струка, со голем број државни и меѓународни награди, признанијата за училиште со најдобра уписна политика во државата. Училиштето во последните години е збогатено со многу нови функционални простории и со нови нагледни средства, кои ги подобрија условите за работа во училиштето.

Пред бистата на патронот свежо цвеќе положија претставници на Советот на општина Струмица, од Одделението за образование, професори и ученици на ова училиште и претставници на здруженија.