Во Кабинетот по музика во гимназијата „Јане Сандански“ во Струмица ученици под менторство на своите професори се подготвуваат за поставување пред публиката на драмско-музичкиот перформанс за младешката љубов, испреплетена со музиката и стиховите на Владо Јаневски, а го насловија по една од неговите песни „Пролетна љубов во септември“.
Во четврток вечер на големата сцена во Центарот за култура „Антон Панов“, ученици солисти, инструменталисти, танчери, актери, ќе пејат, ќе свират, ќе играт, ќе глумат за љубовта, за онаа прва љубов, за средношколската љубов.
Професорите Катерината Милушева, Анита Станковска и Денис Кирчанов неколку недели секојдневно работат со учениците за да можат во четврток на публиката и прикажат настан за паметење, на сцената што ја подготвуваат професорите Македонка Бансколиева, Наташа Туфекчиева, Снежана Недева и Митко Тошев кои со својата креативност и умешност овој драмско-музички перформанс ќе го спакуваат во една прекрасна сценографија.
Поводот за изведба на овој перформанс е патрониот празник на СОУ „Јане Сандански“, а директорката Невенка Стојанова упати јавна покана до сите струмичани да дојдат во четврток во 20:00 часот и да ги видат и слушнат „децата“ на струмичката гимназија и нивниот талент во пеење, свирење, танцување, глумење…
Четврток, 20 април | 20:00 часот | НУЦК „Антон Панов“ Струмица
