Во четврток, 20 јуни од 19:00 часот во фоајето на Центарот за култура „Антон Панов“ во Струмица, свој солистички концерт ќе одржи младата пијанистка Јулијана Јанев од Струмица, ученичка во ДМУЦ „Сергеј Михајлов” во Штип, во класата на проф. м-р Славчо Величков. Таа ќе свири дела од Јохан Себастијан Бах, Сергеј Рахмањинов, Лудвиг Ван Бетовен, Феликс Менделсон, Фредерик Шопен.
Четврток, 20 јуни | 19:00 часот | Центар за култура – Струмица
Јулијана Јанев е родена во Струмица, во 2008 година. Пијано започнува да изучува во второ одделение, во учебната 2015/2016 година во општинското основно музичко училиште „Боро Џони” во Струмица, во класата на проф. Зоран Мазнејков. Од учебната 2022/2023 година своето музичко образование го продолжува во ДМУЦ „Сергеј Михајлов” во Штип, во класата на проф. м-р Славчо Величков.
Активен учесник е на пијано мастеркласови под раководство на маестро Симон Трпчески (Скопје, Македонија), проф. Хајди Елзесер (пијанист и предавач на факултетот за музика во Детмолд, Германија), проф. Александар Сердар (факултет за музичка уметност во Белград, Србија и Академијата за музика во Љубљана, Словенија), Асами Сате (врвна Јапонска пијанистка).
Уште од самиот почеток на своето музичко образование, Јулијана се истакнува со својата исклучтелна желба да ги открие тајните на пијано изведбата. Нејзината исполнителност и посветеност на работата придонесе за краток временски период да има брз развој и да постигне високи резултати.
