![almak](https://strumicanet.com/wp-content/uploads/2024/11/srnet-banner-noe-2-optimized.png")
Здружението „Средби под јаворите – Видое Подгорец“ веќе 22 години го чува и негува ликот и делото на најплодниот македонски писател Видое Подгорец. Во годината во која одбележуваме 90 години од раѓањето на големиот подбеласички исполин, викендот во Струмица се организираше научен симпозиум, како што велат организаторите, со надеж дека раслојувајќи го Подгорец, ќе дојдеме до книжевните топоси врз кои почива неговата книжевна актива, а се нераскинлив дел од локалниот културно-туристички пејзаж на Струмица и околината.
„Со цел да направиме поврзување на книжевноста и културно-туристичкиот потенцијал на Струмица, се исправивме пред предизвикот, во книжевноста да ги побараме крајпатните знаци коишто авторите родени тука, ги оставале кога само физички го напуштиле родниот крај. Но, мислата нивна до крај останала да се напојува од изворите на местото на кое таа истата пуштила никулци. Да се биде жител во полите на големата плодна, зелена и митска Беласица, да се биде современик и да се учи од делото на плодниот Видое Подгорец, би требало да биде добар предуслов да се разбуди нашата свест дека и Подгорец и Беласица се две богати паралелни нарации на еден прекрасна приказна за книжевноста, уметноста и воопшто за културата на Струмица, лулката на светоградбите во Вељуса, Водоча, Банско, Св. Петнаесет Тивериополски Свештеномаченици и планината, костурницата на страдалниците во Беласичката битка. Сите тие имаат свои прототипови во книжевноста“, вели професорката Ана Витанова Рингачева.
Дводневниот научен симпозиум насловен „Локалните културни обележја како топоси во книжевноста за деца“ е дел од програмата Г1 на Општина Струмица. Очекуваните резултати од реализацијата на проектот секако се откривање и презентирање на нови научни сознанија за локалните културни обележја, застапени во книжевноста. Книжевноста за деца претставува основа за потврдување на тезата дека локалните културно-историски обележја препознатливи за струмичкиот регион, можат да бидат во функција на развој на културниот туризам. Придобивките од реализацијата на проектот се поливалентни. Од една страна ги детектираат и им даваат поголема видливост на малите локални културно-историски обележја кои со самото тоа што се вкоричени во книжевното дело, добиваат статус на трајност.
„Со тоа сакаме да поттикнеме позитивна промена на колективната свест за моќта на книжевноста во насока на зачувување и популаризација на културното наследството, токму преку книжевноста како медиум“, додава Витанова Рингачева.
На симпозиумот учествуваа 25 професори и научници од земјата и странство, а воведно предавање одржа проф. д-р Ермис Лафазановски, директор на Институтот за фолклор „Марко Цепенков“ – Скопје.
