Во Центарот за култура во Струмица поставена изложбата „Битово ехо“ на Стојмен Ѓорѓиевски – Туме

Прекрасни слики со изразита декоративност во синтеза со народното творештво и традицијата и нагласена употреба на бакарни елементи, делови од носии и ткаенини со орнаменти, цели носии, употреба на јажиња, дела со уникатен сликарски ракопис на ликовниот уметник Стојмен Ѓорѓиевски – Туме, кој со лирски сензибилитет на неговата душа во контекст на современоста го открива нашето минато низ уметноста и го оживува за сите времиња.

„Битово ехо“ е насловена изложбата на Стојмен Ѓорѓиевски – Туме од Крива Паланка, која синоќа во Центарот за култура „Антон Панов“ во Струмица ја постави ЛУ Библиотека „Благој Јанков Мучето“.

„Стојмен Ѓорѓиевски – Туме, ликовниот израз ги изедначува низ хармонија ритамот на боите, симболите и трансформацијата на формите и облиците. Тој израз не останува на површината на просто одразување на мотивите, туку реалистички jа допира стварноста низ лиричноста на душата. Сликарска нарација која со гестот, бојата и симболите (бакарни орнаменти, импрегнирани јажиња, пафти и носии), низ носталгија оживува трогателна радост, од длабочината на нашиот естетски и национален сензибилитет“ – напиша за Туме, д-р Јордан Михајловски.

Стојмен Ѓорѓиевски – Туме во изминатите 50 години творештво има создадено над 1500 ликовни дела со различни тематски целини.

Изложбата „Битово ехо“ во Центарот за култура „Антон Панов“ струмичани ќе имаат можност да ја видат во наредните десеттина дена.

ФОТОГАЛЕРИЈА