Утре, (понеделник, 16 септември) во 19:30 часот во Центарот за култура „Антон Панов“, по шести пат, а за прв пат во Струмица ќе се одржи настанот „Љубов за сите“ во чест и спомен на големата македонска уметница Андријана Мациев, која прерано замина во Вечноста, но остави дела по кои ќе ја паметиме засекогаш.
На манифестацијата ќе бидат поставени 20 дела од 3 ликовни циклуси на уметницата Андријана Мациев. „Живот во бои“, „Женски приказни“ и „Шарени вибрации – Разбуди се, погледни во сонцето и насмевни се“. Ќе бидат промовирани двата алманаха, со наслов „Љубов за сите“, пишувани од група автори, инспирирани и вдахновени од земниот и небесниот живот на Андријана Мациев, олицетворение на Ангел Небесен.
Овој настан се одржува по повод роденденот и двеипол години од заминувањето на Андријана Мациев.
Андријана замина од оваа реалност на 12 мај 2022 година, но нејзиниот лик и дело се инспиративни и чудесно живи и денес, па затоа на 16 септември, ќе го одбележиме нејзиниот 44 роденден, со оваа пригодна манифестација во чест на нашата сакана, почитувана, величествена уметница Андријана Мациев, велат организаторите.
Манифестацијата ќе ја води Ѓорѓи Калајџиев, а на присутните ќе се обрати и нејзината мајка Јулија Мациевска. На манифестацијата ќе земат учество и истакнати ликовни уметници, поети и вокални солисти.
Покана до струмичани, да бидат дел од овој исклучитечен културен настан, во чест на Андријана Мациев, која беше позната и на струмичката публика, со своја ликовна изложба, учесник на ликовна колонија во Струмица и ликовни перформанси.
Влезот е слободен…
