Денеска и утре во Струмица во хотелот „Сириус“ се одржува вториот Национален рурален парламент. Овој настан спои повеќе од 80-тина претставници граѓанскиот, приватниот и јавниот сектор кои заедно креираа препораки за подобрување на квалитетот на живеење во руралните средини во земјата во доменот на иновации во земјоделското производство, можности за младите од руралните средини и ЛИДЕР (LEADER) пристапот. Препораките ќе служат како основа за градење политики на локално и регионално ниво насочени кон долгорочно позитивно влијание на овие заедници.
Целта на овој настан е да се унапреди националната платформа на рурални граѓански организации, локални акциски групи и земјоделски здруженија, која ќе продолжи уште позасилено да комуницира со локалната и националната власт во заедничкото дефинирање на политиките и прашањата поврзани со руралниот развој. Истовремено, Вториот национален рурален парламент беше основа за размена на искуства меѓу организациите од руралните средини во земјата, меѓународните организации и експерти кои работат во истата област.
Вториот Национален рурален парламент ќе заврши со теренски посети, каде учесниците ќе може да сведочат на позитивни примери за рурално претприемништво, рурален туризам, природни потенцијали и ресурси преку посети на предучилишниот едукативен центар „Огражденски пеперутки“ во селото Радово, општина Босилово, Агро Кодем, компанија за производство на зеленчук во село Петралинци, општина Струмица како и креативниот центар на заедницата (работен хаб) „Нексус“ во Радовиш.
Се очекува овој настан да прерасне во традиционална активност која ќе ги позиционира руралните средини како носители на развојот на технологијата, иновациите, етичките бизнис практики и развојот на човечки ресурси.
Преку вакви активности, УСАИД придонесува кон вклучување и дискусија помеѓу руралното население и креаторите на политики со цел подобрување на руралните политики и адресирање предизвици поврзани со руралниот развој. Вториот национален рурален парламент е организиран во рамки на Програмата на УСАИД за развој на заедницата, имплементирана од Мрежата за рурален развој на Северна Македонија.
