![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Денеска во Струмица се одржа шаховски натпревар на слепите лица. Освен домаќините струмичани, на натпреварот дојдоа гости од Гевгелија, Неготино, Кавадарци и Кочани, а беа поканети и гости од Петрич и Благоевград во соседна Бугарија.
На настанот присуствуваше и претседателот на Националниот сојуз на слепи, Жарко Селковски и претседателот на Националната спортска федерација на слепи, Богоја Јошев.
„Денеска по покана на спортскиот клуб „Атрофија“ од Струмица дојдовме тука да учествуваме на овој меѓународен турнир во шах. Спортската федерација на слепи ги поддржува сите меѓународни турнири кои се одржуваат во државата, а кои се битни за нас слепите, особено, како шахот, голбал. Сите градови коорганизираат турнири, се поддржуваат со отприлика 30.000 денари за самиот настан. Им посакувам на сите повеќе дружба и успех во шахот“, рече Јошев.
Селковски подвлече дека овие настани се од посебно значење за слепите затоа што тие имаат можност да се дружат, да спортуваат, но и да разговараат и да разменуваат мислења за правата и бенефициите на слепите во земјава и надвор од неа.
„Традиционално веќе можеби повеќе од 10 години соработуваме со Бугарија, со најблиските градови, Петрич пред сѐ, а потоа и Благоевград. Мислиме дека овие средби се од посебно значење. Прво да се дружиме, да излеземе од дома, да спортуваме на некој начин, а второ да ги видиме и правата и бенефициите што ги имаат таму, или пак тие од тука, да си размениме мислења, и нормално да се подобрат ако може да се подобрат, на локално ниво пред сѐ“, рече Селковски.
На здруженијата кои се дел од Националниот сојуз на слепи, претседателот Селковски им додели книги, македонско-албански и албанско-македонски речник и разговорник, напишани со брајево писмо, и аудио плеери, кои пак се донација од американска евангелистичка црква.
