![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Ветераните на ВМРО-ДПМНЕ од сите краишта на Македонија денеска беа во Струмица на Втората годишна конференција на Унија на ветерани на ВМРО-ДПМНЕ, насловена „Традиција која обврзува за иднина која доаѓа“.
„Ова се мигови на пресвртница, на колективно рестартирање на деградираното општество и на враќање на вредностите во кои веруваме. Лошите политичари не се и не смеат да бидат посилни од добриот и напатен народ. Се бориме за достоинство, среќа и иднина! За нашата горда и просперитетна Македонија“, им кажа на ветераните лидерот на ВМРО-ДПМНЕ, Христијан Мицкоски на овој втор нивни собир, а на кој покрај Мицкоски присуствуваа и членови на највисокото партиско раководство, пратеници, градоначалници од нивните редови.
Мицкоски потенцираше дека ветераните на ВМРО-ДПМНЕ ја имаа можноста и честа да бидат првите кои во свои раце го имаа предизвикот да создаваат држава.
„Со сите перипетии, светли и темни страни ВМРО-ДПМНЕ како легитимен наследник на идеите на ВМРО ја имаше неизбришливата трага во создавањето на независната македонска држава. И не е доволна само идејата, туку се потребни и луѓето да ја носат идејата. И тогаш, на почетокот на деведесеттите не беше лесно да си ВМРО-ДПМНЕ затоа што противник беше еден гигант и комунистички апарат граден со децении, проектиран за уништување и разбивање на секоја слободно мислечка идеја која е антипод за она што беше слово за ВМРО-ДПМНЕ своја држава, слобода, институции независност. Генерации Македонци беа жртви на комунистичкиот режим, во таа нималку лесна ниту пак рамноправна битка влегоа првите членови на ВМРО-ДПМНЕ на кои јас оддавам почит. ВМРО-ДПМНЕ не е на еден или двајца таа му припаѓа на народот, и на Македонија“, кажа Мицкоски.
