Во Струмица промовиран проектот „Биди ИН, биди ИНклузивен, биди ИНклудиран“

Во Струмица беше промовиран проектот „Биди ИН, биди ИНклузивен, биди ИНклудиран“, кој е финансиран од Европската Унија, со цел да се обезбеди рамноправен пристап на децата со попреченост до квалитетна настава и пристапна и стимулативна средина за учење, преку месечни стипендии и образовна поддршка за учениците со попреченост, грантови и обуки за училиштата, како и развивање на јавната свест.

Овој проект се залага за квалитетно и инклузивно основно образование со цел секое дете да има еднакви можности за развој, учење и остварување на своите потенцијали. Проектот го спроведува Фондацијата „Чекор по чекор“, заедно со партнерите Здружение за промоција и развој на инклузивно општество „Инклузива“ и Здружение за давање услуги на лицата со попреченост „Хандимак“, во соработка со Министерството за образование и наука.

Бранка Џајковска, менаџер на проектот ги презентираше спроведените активности во овој регион во форма на грантови, стипендии, обуки и туторска помош со цел суштинско вклучување на учениците со попреченост во училиштата.

„Општина Струмица е навистина ин во полето на инклузивноста и инклузивното образование. Овој факт е видлив низ досега преземените активности и проекти, како „Инклузивни партнерства во заедниците“ и „Инклузија на деца со посебни образовни потреби“, опремувањето на сензорните соби во училиштата „Сандо Масев“ и „Видое Подгорец“ и многу други. Со предвидените активности во рамки на Стратегијата за развој на образованието на општина Струмица за 2023 – 2027 година, продолжуваме да работиме на креирање поинклузивна Струмица. Струмица креирана за потребите на сите нејзини жители“, кажа во своето обраќање градоначалникот на Струмица, Костадин Костадинов.

Во рамките на проектот се реализираат осум регионални настани во форма на панел-дискусии во осумте плански региони како дел од третата проектна кампања за подигање на јавната свест за важноста од инклузивното образование.