![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Струмица од синоќа до 5 август по 19-ти пат е домаќин на интернационалниот филмски фестивал „АСТЕРФЕСТ“ под мотото „Кинореалност ’24“. Во петте дена ќе бидат прикажани 24 филмови во конкуренција, од исто толку земји и уште четири филмови во ревијалната програма.
„Во предвечерието на големиот 2-ри август и празнувањата на двата македонски илиндена посакувам да го празнуваме филмот и да уживаме во магијата на филмското платно“ – кажа градоначалникот на општина Струмица, Костадин Костадинов отворајќи го годинашниот „Астерфест“.
Градоначалникот Костадинов по отворањето му ја врачи наградата „Астер“ на лауреатот за 2024 година македонскиот режисер и сценарист Антонио Митрикески, кој оваа награда ја доби за неговата исклучителна филмска поетика и естетски вдахновениот и минуциозен филмски опус.
„Оваа награда ми даде поттик да работам, но и да ги отвори портите на младите автори кои ги има во изобилие во Македонија, да им се даде шанса, затоа што не смееме да заборавиме дека филмот е еден од најголемите амбасадори на една земја“ – кажа Митрикески заблагодаривајќи се за наградата.
Основачот на „Астерфест“, Горан Тренчовски заблагодарувајќи се на сите поддржувачи на фестивалот кажа дека оваа 2024 година некако симболично кореспондира со мотото на фестивалот „Кинореалност ‘24“, кое не е само алузија на годината којашто моментно ја живееме, туку можеби е и алузија на 24-те филмови кои се во официјалната програма или на онаа платформа на филмскиот облик кој е составен од 24 сликички коишто мораа да треперат во една секунда, кажа Тренчовски.
„Астерфест“ за првпат оваа година има соработка и со Европската филмска академија, со БАФТА, како и со двократните добитници на Американската филмска академија, високите претставници од Скандинавската филмска дистрибуција, кои се специјални гости на фестивалот.
Во првата натпреварувачка вечер, покрај „Човекот кој не можеше да молчи“, на програмата беа прикажани уште 12 селектирани кратки филмови: „Гилгамеш“ на Шаќир Весели, „Астран“ на групата автори од „Исарт“, „Глувчевата куќичка“ на Тимон Ледер, „Луди и свесни“ (премиера) на Мануела Златкова, „Споменик“ на Сиџија Џенг и Џјашји Ву, „Малиот талкач“ на Каролина Томкова, „Полжавска приказна“ на Ели Воткинс и Хелен Грифитс, „Песок“ на Розе Торн и Матео Коста, „Сламеница кон иднината“ на Николас Нојхолд, „Оп, риба“ на Вибин Виџајан, „Шепкач“ на Младен Ѓукиќ и „Сржта“ на Оберт.
Годинашното жири кое ги ги оценува филмовите го сочинуваат, Зејгам Азизов, британски филозоф и уметник, Ганимет Сава, основачка и претседателка на Интернационалниот филмски фестивал „Уметност без граници“ во Приштина и уметникот Никола Пијанманов од Струмица.
Денеска во 11:00 часот, во хотелот „Горан Пандев“ во Струмица ќе се одржи традиционалниот „Астер портрет“ (Тивериополска филмска беседа) за Митрикески, на кој ќе зборува критичарот Стојан Синадинов. Веднаш потоа фестивалските гости заминуваат на традиционалната посета во Манастирот во Велјуса.
