![almak](https://strumicanet.com/wp-content/uploads/2024/11/srnet-banner-noe-2-optimized.png")
Денеска Струмица и струмичани на достоинствен начин ја одбележаа 83-годишнината од првите истрели во Прилеп и Куманово, со што започнала Народноослободителната и антифашистичка војна на Македонија. Македонскиот непокор повторно стапи на сцена со единствена цел – слобода на Македонија и македонските граѓани.
„11-ти Октомври не е било кој ден, затоа што 11-ти Октомври е ден на македонските партизани, борците против фашизмот и борците за слободата. Историските факти велат дека народноослободителната и антифашистичката војна на Македонија за тогашната и денешната наша слобода својот живот го положиле 24.000 граѓани на оваа наша македонска татковина, и ете затоа Денот на востанието на македонскиот народ и Денот на борецот се два компактибилни нешта, нераскинливи алки од историјата кои взаемно се надополнуваат. Да се зборува за едната независно од другата, едноставно е невозможно. Претставува задоволнство, чест и гордост низ збор да се оживуваат настаните од нашето историско минато. Да се зборува за епопејата на Македонија и македонскиот народ и нејзиниот бесмртен идеал, да се зачуваат во меморијата спомените за македонскиот непокор и да се извадат повторно на виделина многуте историски епизоди во кои протагонисти се луѓе возљубени во својата татковина, луѓе кои непоколебливо биле решени да го претворат во јаве долговековниот сон за национални, социјални, политички слободи и права“ – кажа Елена Маѓеровска Паликарова, заменичка на градоначалникот на општина Струмица.
Претставници на Општина Струмица, на Сојузот на борците и нивни поддржувачи, на политичките партии СДСМ, ВМРО-ДПМНЕ и ЗНАМ – За наша Македонија, положија свежо цвеќе пред Споменикот на Револуцијата во големиот градски парк, а свеченоста беше збогатена со настапот на членовите на рецитаторската секција при Домот за деца и млади „Благој Мучето“.
11 Октомври – Денот на македонското востание и Денот на борецот е еден од трите најголеми историски празници, покрај Двата Илиндена и Денот на независноста.
