Во Струмица денеска беше одбележан 9 Мај – меѓународниот Ден на победата над фашизмот и Денот на Европа.
На пригодната свеченост која што се одржа пред Споменикот на паднатите борци во НОАВМ во малиот Градски парк, за значењето на празникот говореше градоначалникот на Струмица, Костадин Костадинов.
„Денеска чествуваме два настана и два датума со планетарно значење. Едниот се случил на 9 Мај 1945, а другиот на 9 Мај 1950 година. Меѓу едниот и другиот постои челичен и цврст мост на поврзување, мост кој треба да ни биде поука, како да се однесуваме кон иднината без премногу да му робуваме на минатото. По нашето полноправно членство во НАТО Алијансата, Северна Македонија никогаш не била толку блиску до остварувањето на долгугодишниот сон, како земја-кандидат за членство во Унијата од декември 2005 година. За добивање датум за почеток на преговори со ЕУ, повторно сме исправени пред предизвикот од недоследно наметнување на непотребни бариери, овојпат од нашиот источен сосед – Бугарија. Но тоа не треба и не смее да не поколеба, да скршнеме од коловозот кој води до нашата посакувана цел. Напротив. По ниедно друго прашање во оваа наша земја, немало толку јасен и недвосмислен консензус, како што е прашањето за нашето евроинтегрирање. Треба да останеме мудри и на крилјата на мудроста да го оствариме нашиот стремеж, а притоа да ги задржиме белезите на нашата посебност. Убеден сум дека тоа ќе се случи, на наше заедничко задоволство“ – кажа градоначалникот Костадинов.
Градоначалникот и членови на Советот на општина Струмица, во чест на загинатите борци положија свежо цвеќе пред споменикот, а цвеќе положија и претставници на Општинскиот одбор на Сојузот на борците, политички партии, здруженија на граѓани и јавни институции. Рецитатори од Домот за деца и млади „Благој Мучето“ рецитираа револуционерна поезија.
На денешен ден пред 78 години, со потпишувањето на безусловната капитулација на нацистичка Германија, официјално беше ставен крај на Втората светска војна во која учествувале 61 земја со над две милијарди жители. Безусловната капитулација на Третиот Рајх е потпишана во разурнатиот Берлин, само неколку минути по полноќ на 9-ти мај 1945 година. Со тоа беа запрени крвопролевањата и страдањата од Втората Светска војна во која загинаа над 50 милиони луѓе од кои дури 20 милиони беа од тогашниот Советски сојуз, а повеќе од 30 милиони беа цивили. Во нацистичките логори беа убиени околу 12 милиони луѓе од кои половината беа Евреи. Материјалната штета од Втората Светска војна, само во Европа беше проценета на околу 200 милијарди американски долари.
Она што не смее да се заборави е дека и нашава земја беше дел од таа страотна војна. Македонија беше на страната на антифашистичката коалиција и во борбите против фашистичките окупатори даде околу 33.000 жртви, меѓу кои се и седумте илјади Евреи кои за време на војната беа депортирани во конценрациониот логор Треблинка.
