Во Струмица одбележана Европската недела на мобилност – градоначалникот Костадинов најави дополнителни 5.4 километри нови велосипедски патеки

Во рамките на Европската недела на мобилност и Светскиот ден без автомобили денеска во Струмица под мотото „Заеднички јавен простор“, а во организација на „Јуроп хаус“ Струмица се одржа традиционалното дефиле – возење велосипед низ улиците на Струмица во кое беа вклучени ученици од струмичките училишта.

„Нема ден да помине, а да не покажеме и докажеме, повторно и повторно, дека сме општина – пример за сите останати. Тоа не го велам јас, тоа го зборуваат проектите. И денеска бевме мобилни одбележувајќи ја „Европската недела на мобилност“, со најава на втората фаза од проектот „Струмица – Паметен вело град”, која ќе донесе дополнителни 5.4 километри нови велосипедски патеки“ – најави градоначалникот на општина Струмица, Костадин Костадинов кој заедно со учениците зеде учество во дефилето со велосипеди низ улиците на Струмица.

Се планира проширување на велосипедската инфраструктура на булеварот „Климент Охридски“, на булеварот „Гоце Делчев“ од двете страни и на улицата „Цветан Димов“, каде ќе има поврзување на Градскиот стадион со двете игралишта со вештачка трева. Планирана е и велосипедска патека помеѓу градот Струмица и селото Дабиље кое ќе биде во рамките на булеварското решение со двосмерна велосипедска патека со широчина од 2,5 метри.