![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Денеска во Секторот за внатрешни работи – Струмица беше одбележан 7 Мај – Денот на македонската полиција на кое покрај вработени во Секторот присуствуваа и градоначалници од југоисточниот регион, претставници на институции и компании со кои соработува СВР Струмица, ученици, како и директорот на Бирото за јавна безбедност, Александар Јанев.
„Колеги Ви благодарам за Вашиот труд, за Вашата пожртвуваност, професионалност која ја покажувате секој ден. Нека овој ден, нашиот празник биде уште поголем поттик за понатамошно унапредување во полициското работење во сите сегменти, а проследена со интензивна соработка со граѓаните и меѓународните партнери. Само така ќе изградиме посилна, поправедна и побезбедна Македонија“ – кажа началникот на СВР Струмица, Дејан Ефтимов во своето обраќање до колегите по повод празникот на македонската полиција.
Ефтимов додели плакети на директорот на БЈБ за поддршка и посебен придонес во остварувањето на целите на СВР Струмица, како и на 20-тина институции, приватни компании и поединци за придонес и соработка со СВР Струмица во областа на безбедноста.
Директорот на Бирото за јавна безбедност, Александар Јанев во своето обраќање кажа дека полицијата е чувар на државата, а униформата и значката што ја носиме е симбол на гордост, чест и одговорност, а не на моќ, и дека Македонија заслужува полиција која ќе работи по закон и со интегритет.
Тој денеска во Струмица постхумно додели признанија на херои и загинати припадници на МВР. Такви признанија беа доделени за Ерол Готак, Атанас Јанев, Коце Крстев, Драги Мицев, Сашко Соколов.
На свеченост беа презентирани поетски творби и цртежи од ученици на тема „Хероите носат униформа – но и срце“, од јавниот конкурс кој го распиша струмичката библиотека „Благој Јанков Мучето“ во соработка со СВР Струмица, а на кој пристигнале над 60 литаратурни творби и околу 80 цртежи и илустрации. Настанот го збогатија и децата од градинката „Виножито“ од Струмица облечени во маици со паролата „Хероите носат униформа – но и срце“.
Присутните имаа можност да се запознаат со дел од опремата која ја користат полициските службеници при извршување на редовните работни активности и специјалните задачи.
