Во рамките на Кампањата „16 дена активизам за борба против родово базирано насилство“ што ја организира Општина Струмица со ЗГ „Скај плус“ се одржа трибина на која учествуваа градоначалникот Костадин Костадинов, Викарниот епископ Стобиски г.Јаков, Милка Клесова од Подрачната единица на Министерството за правда, Тони Петров од СВР Струмица и Стојне Митева, психолог од ЗГ Скај Плус.
„Денеска живееме во време на сеопшто насилство. Иако Црквата ја прозиваат за поддржување на стереотипи, тоа го зборуваат оние кои немаат никакви познавања. Црквата вели да се издржи животот, но не да се трпи насилството“, истакна во своето обраќање Викарниот епископ г. Јаков.
Тој посочи дека истовремено не смееме да ги заборавиме и насилниците.
„Како духовник познавам голем број на луѓе кои се оставени од нивните жени и деца. Тоа се личности кои неизмерно страдаат и на кои им е потребна помош и подадена рака. Се надевам дека во блиска иднина ќе можеме да одговориме и на овие предизвици преку вакви проекти“, додаде г. Јаков.
