![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
„Се чуствувам исполнет со среќа и задоволство што сум вечерва меѓу вас, а можам само да замислам како се чуствувате вие кога знаете дека утрешниот ден на сесловенските просветители е всушност ваш ден. Претпоставувам дека тоа не е само гордост која ве обзема за вашата животна професија, туку и чувство на обврска да продолжите да го давате најдоброто во себе, за доброто на Струмица, за доброто на Македонија и за доброто на генерациите кои утре, задутре ќе ја преземат одговорноста за иднината на нашето заедничко општество“ – им кажа на просветните работници од струмичките училишта, градоначалникот Костадин Костадинов на Свечената академија која во предвечерието на Денот на сесловенските просветители, Светите браќа Кирил и Методиј се одржа во Центарот за култура „Антон Панов“ во Струмица.
„Вие, чинителите и креаторите на нашето образование и воспитување треба да бидете најдобрата рефлексија на денешното и утрешното исполнување на кирилометодивскиот аманет“ – порача Костадинов додавајќи дека е потребна поголема грижа за развој на образованието.
„Верувајќи истовремено, свесни за спецификите, кои со себе ги носат образовните професии, примопредавање на знаење и вештини треба да биде во согласност со нужната хармонија меѓу потребите на децата и учениците во една и доследна и професионално исполнување на програмските задачи од воспитно-образовниот процес од друга страна. Унапредувањето и вложувањето во тој процес е еднакво пропорционално со резултатите кои се очекуваат од него“ – кажа градоначалникот Костадинов.
И годинава, трета година по ред, Општина Струмица додели Плакети и Признание на најдобрите наставници и професори во основните и средните училишта, како и на воспитувачи и негуватели во детските градинки во општина Струмица.
Признание и Плакета „Св. Кирил и Методиј“ добија: Јасмина Митевска и Менка Хрјешиќ од Детската градинка „Виножито“, Елизабета Ангелова и Јасминка Деровска од Детската градинка „Детска радост“, Ана Цунева од ООМУ „Боро Џони“, Гордана Мучева од ООУ „Гоце Делчев“ Вељуса, Весела Русоманова од ООУ „Герас Цунев“ Просениково, Зорица Андонова од ООУ „Маршал Тито“ Муртино, Лилјана Младеновска од ООУ „Св. Кирил и Методиј“ Дабиље, Зорица Димовска Митева од ООУ „Даме Груев“ Куклиш, Спасо Крстев од ООУ „Видое Подгорец“ Струмица, Десанка Ѓоргиева од ООУ „Никола Вапцаров“ Струмица, Билјана Николова од ООУ „Сандо Масев“ Струмица, Снежана Узунова од ООУ „Маршал Тито“ Струмица, Билјана Бајрактарова од СОУУД „Димитар Влахов“ Струмица, Никола Узунов од РСЦОО „Никола Карев“ Струмица и Елизабета Витанова од СОУ „Јане Сандански“ Струмица.
Во името на 17-те наградени се заблагодари Зорица Димовска Митева, која кажа дека оваа признание ќе биде поттик да се продолжи да го чуваат и негуваат скапоценото дело на сесловенските просветители, а за доброто на децата и учениците.
24 Мај е денот кога солунските браќа Светите Кирил и Методиј тргнале на својата света моравска мисија, во таа 863-та година, во тој по многу нешта значаен 9-ти век кој ја донел писменоста и христијанската самосвест на словените.
