Во спортската сала „Тодор Александров“ во селото Куклиш, општина Струмица од денеска до 10 јануари 2023 година ќе се одржува турнир во мал фудбал „Куклиш 2022/2023“ на кој ќе учествуваат 24 екипи, а ќе се натпреваруваат за фонд од 190.000 денари.
Синоќа во ресторанот „Вила Парк“ во Струмица се одржа ждрепка на екипите во групи кои ќе се натпреваруваат во периодот на одржувањето на овој турнир.
Александар Марковски, еден од организаторите на турнирот најавува силен турнир со интересни натпревари, барем според пријавените играчи и екипи, а освен половината екипи кои се од струмичкиот регион учество ќе земат и екипи од Скопје, Велес и Кавадарци. Од планираниот фонд, 100.000 денари ќе освои првопласираната екипата, 60.000 денари за второпласираната и 30.000 денари за екипата која ќе го освои третото место. Планирани се и награди за најдобриот играч, стрелец и голман.
Натпреварите ќе се играат секоја вечер во 19:00, 20:00 и 21:00 часот во спортската сала во Куклиш, а вечерва први од 19:00 часот ќе се натпреваруваат екипите на „Токи Еднокуќево“ и „Куси Бокле“, во 20:00 часот „Barbershop Limited Edition“ и „Тотал Инжинеринг“, додека од 21:00 часот ќе играат „Јаневи Куклиш“ и „Моноспитово“.
