Во Католичката црква „Раѓање на Свети Иван Крстител“ во Струмица изложени моштите на Свети Стефан

Синоќа на третиот ден од Божиќ, во предвечерието на денешниот празник Свети Стефан првомаченик и архиѓакон, во Католичката црква „Раѓање на Свети Иван Крстител“ во Струмица, Н.В.П. монсињор Киро Стојанов ги изложи пред верниците дел моштите на светецот кои во Струмичката парохија ќе бидат во трајно поседување.

Во проповедта епископот Стојанов се осврна на животот и сведоштвото на светиот првомаченик Стефан. „Луѓето со добра волја, кои ги сакаат сите и им простуваат на сите ќе го добијат мирот Божји“, рече монсињор Киро Стојанов.

„Само христијанинот кој може да ги повтори зборовите на свети Стефан првомаченик „Господи не земај им го ова за грев“, ќе биде ослободен од своите лични гревови“.

Епископот Киро Стојанов се осврна на јубилејната година, изнесувајќи детали за тоа како може да се добие јубилејниот потполн опрост од времените казни.

Носени од надежта, која е во центарот на Јубилејната година, епископот Стојанов упати молитва до светиот првомаченик Стефан, чиј мошти денес ги чествуваме, неговото сведоштво да биде пример за сите, притоа честитајќи го именденот, на оние кои го носат името на првомаченикот Стефан.