Вокалната група „MedjuWodje“ од Гарешница викендот беа во Струмица, а настапија и во Владимирово

Една од најпопуларните вокални групи на хрватска традиционална музика „MedjuWodje“ од Гарешница, Хрватска викендот беа во Струмица, домаќини им беа познатите македонски естрадни ѕвезди Ленче и Горан Кукиќ и членовите на групата „Јупитер“.

Членовите на „MedjuWodje“ покрај посетата на културно-туристичките места во струмичкиот регион имаа и свој настап во Културниот центар „Горан Алачки“ во Владимирово, беровско на семинарот за македонски фолклор организиран од познатиот македонски хармоникаш Горан Алачки. „MedjuWodje“ во прекрасниот етно амбиент на Културниот центар изведоа неколку хрватски традиционални песни со кои ги воодушевија учесниците.

„Големо е задоволство и честа што овие прекрасни вокали се гости во мојот Културен центар и што изведоа една прекрасна програма со која не само мене, туку сите гости кои се овде ги воодушевија со нивната изведба. Ни го донесоа звукот на славонија, на барања, на кордун, на меџумурје, за нас тоа се блиски предели коишто нашата генерација од онаа стара Југославија ги разбира малку повеќе, а вашето пријателство со Горан Кукиќ датира од тоа време. Навистина убав „ивент“ направивме и се надевам дека ова нема да биде прво и последно. Вашата уметност и знаење заслужува да ние направиме еден мост на соработка кадешто ќе ги зближиме нашите култури малку повеќе“, кажа маестро Горан Алачки.

И Вјекослав Мартиниќ првиот човек на „MedjuWodje“ не го криеше своето задоволство од поканата да ја посетат Македонија и Струмица, а посебно што ја имаа можност да се претстават во Културниот центар на Горан Алачки во Владимирово.

„И нашето задоволство е огромно и нам ни беше чест што ја имавме можноста да се претставиме овде и што нашата програма ви се допадна. Соработката продолжува и понатаму, бидејќи целта наша е да ја зближуваме традиционалната музика на балканот, кој некогаш гореше и оживеа. Без разлика на тие поделби кои ги имаше во секоја држава, музиката е музика, културата е култура, тие не познаваат никакви граници, едноставно тоа е една добра приказна и ќе ја продолжиме да ја пишуваме за нашата соработка и пријателство“, кажа Вјекослав Мартиниќ.

Ова е трето доаѓање во Струмица на мешовитата вокална група „MedjuWodje“ од Гарешница. Во 2009-та година и во 2012-та година на фестивалот на староградски песни „Под кулите на Струмица“, а во 2014-та година нивни гости беа Ленче и Горан Кукиќ на 10-годишнината од основањето на ова група. Ги очекуваат и догодина на 20-годишнината во Гарешница.