ВМРО-ДПМНЕ до Борче Цветков: Изборите ќе ги изгубите, ама барем да се зачува достоинството

Од Општинскиот комитет на ВМРО-ДПМНЕ во Струмица реагираат за каменување на штабот на ВМРО-ДПМНЕ во Вељуса и, како што пишуваат во соопштението, „заплашување на граѓани во турското маало и во администрацијата“.

„Почитувани сограѓани,

СТРУМИЦА НА ОВИЕ ИЗБОРИ СТАНА СИМБОЛ НА МАКЕДОНСКАТА СЛОБОДА!

Многу скоро наша Струмица ќе стане симбол на правдата и борбата против корупцијата и криминалот. Струмица го препозна важноста на моментот и враќање назад нема.

Со ова обраќање Општинскиот комитет на ВМРО-ДПМНЕ известува и предупредува на притисоци од СДСМ која е во паника поради поразувачките резултати на првиот круг од Претседателските избори.

Голем број на вработени во администрацијата се жалат на притисоци и закани. СДСМ се обидува да шири страв со уцени најпрвин кон голем број свои членови и активисти, а потоа се дрзнува да упатува закани и застрашувања на активистите на ВМРО-ДПМНЕ.

Веќе втор пат е каменуван штабот на ВМРО-ДПМНЕ во Вељуса, што е уредно пријавено од страна на наши сограѓани. Ист случај на каменување е пријавен и во Габрово.

Во Турското маало се вршат притисоци во 2 часот по полноќ. Граѓаните се поплакуват дека партијата на власт која е во заминување сé уште си дозволува да ги заплашува ранливите категории на граѓани со укинување на помош и примања.

Ги охрабруваме сите наши сограѓани, особено членовите на СДСМ кои се ослободија и веќе го напуштаат бродот на СДСМ кој тоне да не подлегнуваат на заканите и притисоците. Апелираме до администрацијата да не подлегнуваат на никакви притисоци и закани и уредно да ги пријавуваат.

Знаеме дека станува многу сложено да се контролира паниката во Општинската организација на СДСМ во Струмица, како резултат на лошото владеење во сите мандати на локална и национална власт, но му препорачуваме на претседателот на ОО на СДСМ Струмица: Изборите ќе ги изгубите, барем да го сочуваме достоинството!“ – стои во денешното соопштение на ОК на ВМРО-ДПМНЕ Струмица.